Egipte wil sokkerstryd uitstel
2011-02-23 08:18
Bloemfontein. – Die Farao’s soek meer tyd om hulle voor te berei vir die stryd teen Bafana Bafana.
Die politieke onrus in Egipte het die sokkerliga daar tot stilstand gedwing en die Farao’s sien nou nie meer kans om aanstaande maand al na Suid-Afrika te reis nie.
Hulle gaan hul vandeesweek tot die Konfederasie vir Afrika-sokker (CAF) wend om die kwalifiserende groepwedstryd teen Bafana Bafana vir die Afrikabeker-toernooi met minstens twee maande uit te stel.
Die spanne was veronderstel om op 24 Maart kragte te meet, maar Egipte wil dit ná al die woelinge daar, wat tot die val van pres. Hosni Mubarak gelei het, tot die middel van die jaar uitstel.
Die sewemalige Afrika-kampioen is in die knyp omdat hy nie een van sy eerste twee groepwedstryde kon wen nie, terwyl Suid-Afrika die voorloper in Groep G is.
Die Bafana-breier, Pitso Mosimane, en die Premiersokkerliga het reeds die plaaslike program vir Maart gewysig sodat hy meer tyd met die nasionale spelers sal hê.
Matlhomola Morake, mediawoordvoerder van die Suid-Afrikaanse Sokkervereniging, sê hy het nog geen kennisgewing van CAF ontvang nie en kan daarom nie kommentaar lewer nie.
Hamada Seki, Egipte se hulpafrigter, het aan filgoal.com gesê hulle sal Woensdag ’n brief aan CAF stuur waarin hulle versoek dat die wedstryd tot Junie uitgestel moet word.
Bly op hoogte van al die jongste sportnuus deur Nuus24Sport op Twitter te volg.
- Sport24