Duitse kultusklub wat almal aflag, bly dalk nou bo
2010-08-26 08:19
Johannesburg - Dis deesdae lekker om ’n Duitse sokker-ondersteuner te wees.
Die Bundesliga is opwindend, die kaartjies goedkoop en die paviljoene stampvol.
Al is dit nou nie die beste spanne in Europa nie, is die mededinging strawwer as elders en die standaard hoog genoeg dat die kampioen, Bayern München, in die laaste Kampioeneliga-eindstryd gespeel het.
Die klubs is solvent, die sokker lekker en die nasionale span een van die opwindendste en jongste op die internasionale toneel.
En vir buitestanders, wat ’n lekker storie soek, bied die Bundesliga hierdie seisoen sommer twee.
Hoffenheim is bo-aan die punteleer ná die naweek se afskop toe hy Werder Bremen met 4-1 vermorsel het.
Hoffenheim se sukses pla puriste: die klub het drieduisend skamele ondersteuners, maar die fortuin van ’n sake-magnaat, Dietmar Hopp, agter hom.
Klink na ’n tipiese verhaal van ’n rykaard wat PlayStation met mense wil speel, maar Hopp het op sy dag self vir Hoffenheim gespeel en het dit ondersteun toe die klub in 2000 nog in die agtste liga gespeel en hy skielik skatryk geword het.
Die stugger ondersteuners van tradisionele superklubs soos Bayern, Bremen en Eintracht Frankfurt skimp dat Hoffenheim se sukses die soort is wat Chelsea en Man City deesdae smaak – skatryk suikerpappies.
Wat dalk waar sou wees as Roman Abromovich in sy jeug vir Chelsea gespeel het en hulle steeds in die agtste liga ondersteun het toe hy skielik baas geword het van al die olie in Siberië.
Dit moet ondersteuners van versukkelde sportspanne se droom wees: soveel geld dat jy die span mededingend kan maak.
Hopp leef dit uit.
Niemand kan kla oor FC St. Pauli nie – dié bestaan al sedert 1899 en was een van die stigtersklubs van die Bundesliga.
Die klub, wat die Reeperbahn-rooiligdistrik van Hamburg verteenwoordig, dobber gewoonweg tussen die tweede en vierde ligas rond en het so pas vir die eerste maal in ’n dekade na die eerste Bundesliga deurgedring.
Die Reeperbahn lok die randfigure van die samelewing en hul klub en verteenwoordig vryheid van denke.
Hulle draf uit op die maat van ACDC se Hells’ Bells.
Dis die metal-klub, dis die klub vir die punk rocker en die gay, die klub wat sy linkse politiek geesdriftiglik genoeg beoefen dat die Chinese regering al druk op hom geplaas het om nie ’n Tibettaanse span te laat speel nie.
St. Pauli het China afgelag.
St. Pauli lag almal af.
En ’n weg-oorwinning met 3-1 oor Freiburg getuig dalk dat hierdie kultusklub dalk bo is om te bly.
Ek hoop vir seker so.
Bly op hoogte van al die jongste sportnuus deur Nuus24Sport op Twitter te volg.
- Sport24