Chelsea stel in Wayne Rooney belang
2010-10-19 15:02
Londen - Chelsea se afrigter, Carlo Ancelotti, het gesê hy sal belangstel om 'n aanbod vir Wayne Rooney te maak, indien dié doelskieter beskikbaar sou wees.
Rooney se toekoms by Manchester United blyk onseker te wees na berigte dat sy verhouding met die afrigter Alex Ferguson versuur het.
Vroeër is berig dat Manchester City gereed sou wees om 'n aanbod te maak. Maar Chelsea is die eerste klub om hul belangstelling openbaar te maak.
"As Rooney in die mark is, dink ek nie net Chelsea sal belangstel nie," het Ancelotti gesê.
Die Red Devils se afrigter sal beslis oor Rooney gevra word by vandag (Dinsdag) se 15:00 perskonferensie voor die Uefa-kragmeting tussen Manchester United en Bursaspor.
Bly op hoogte van al die jongste sportnuus deur Nuus24Sport op Twitter te volg.
-Sport24