Celtic steeds onoorwonne in 2010
2010-03-09 08:26
Johann de Jager
Bloemfontein - Bongani Ndulula het Saterdag hier – pas nadat hy in die 68ste minuut as Bloemfontein Celtic se derde en laaste plaasvervanger opgestuur is – die gelykmakende doel teen Orlando Pirates behaal.
Maar dié uitslag van 1-1 in die laaste ligawedstryd in ’n stampvol Seisa Ramabodu-stadion het nie enige invloed op dié sokkerspanne se eindposisies gehad nie. Die Buccaneers het die Premiersokkerliga (PSL) in die vyfde plek afgesluit, terwyl Celtic sesde geëindig het.
Celtic sal nietemin breëbors rondloop omdat hy onoorwonne in sy laaste sewe ligawedstryde was, waarin hy twee keer aan die wenkant was en Saterdag hier ’n vyfde keer gelykop gespeel het.
Dié uitslag het hom duur te staan gekom. Celtic sal Saterdag in die Orlando-stadion in die herontmoeting tussen dié spanne (in die Telkom-uitklopreeks) sonder vyf spelers moet klaarkom, wat hier in aksie was.
Die Celtic-kaptein, Thabo Nthethe, en Tlou Segolela is saam met die Bafana-oefengroep in Brasilië, terwyl die verdedigers Mbhuyiselo Sambu, Michael Khaile en Johannes Motlhaping skorsings uitdien weens die derde geelkaarte wat hulle Saterdag ontvang het.
Pirates se doelwagter, Moeneeb Josephs, Gert Schalkwyk, Lucas Thwala, Andile Jali, Thulasizwe Mbuyane en Teko Modise sal die wedstryd ook oor hul nasionale verpligtinge misloop.
* Pirates moes Saterdag in die eerste helfte die voortou geneem het, maar Celtic se briljante Kameroense doelwagter, Patrick Tignyemb, het Thwala se poging van die strafkolletjie af gekeer.
Ndumiso Mabena het die besoekers kort ná die hervatting van die tweede helfte laat voorloop.
Ndulula het Moses Spandeel pas vervang toe hy in die 70ste minuut die gelykmakende doel vir Celtic behaal het.
* Die finale PSL-puntestand ná die 30 wedstryde dié seisoen is:
1. SuperSport United 57, 2. Mamelodi Sundowns 56, 3. Kaizer Chiefs 51, 4. Santos 47, 5. Orlando Pirates 44, 6. Bloemfontein Celtic 42, 7. Ajax Cape Town 42, 8. Moroka Swallows 42, 9. AmaZulu 39, 10. Wits 35, 11. Maritzburg United 35, 12. Golden Arrows 32, 13. Free State Stars 31, 14. Platinum Stars 31, 15. Black Aces 26, 16. Jomo Cosmos 24.
- Volksblad