Burkina bitterbek
2011-08-12 08:14
Johannesburg – Die uitbarsting van Burkina Faso se sokkerafrigter, oomblikke nadat Suid-Afrika sy span Woensdagaand met 3-0 afgeransel het, is niks anders nie as suur druiwe.
Só het Pitso Mosimane, die Bafana Bafana-breier, Donderdag gesê nadat Paulo Duarte, sy Wes-Afrikaanse eweknie, ná sy span se liederlike nederlaag hier op Coca-Colapark gal gebraak het.
Duarte het kort ná die vriendskaplike wedstryd uitgevaar teen die Suid-Afrikaanse Sokkervereniging (Safa) se “patetiese reëlings”.
“Dié was ’n baie belangrike wedstryd vir ons ten opsigte van ons wêreldranglys-posisie,” het Duarte gesê.
“Maar ek kon met net die helfte van my spelers speel weens Safa se swak beplanning.
“Ek het lank voor die wedstryd my spanlys aan Safa gestuur, maar hulle het niks gedoen nie.
“Gevolglik kon sewe van my spelers nie betyds visums kry nie, maar dit was waarskynlik deel van hul (Safa se) taktiek,” het Duarte gesê.
Volgens die afrigter van die Suid-Afrikaanse span was dit nie nét Duarte wat met ’n gelapte span moes klaarkom nie.
“Ons was self sonder Steven Pienaar, Reneilwe Letsholonyane, Davide Somma, Anele Ngcongca én Kagiso Dikgacoi.
“Bongani Khumalo en Bernard Parker was boonop in die eerste helfte op die plaasvervangersbank, so ek koop glad nie sy (Duarte se) verskonings nie.
“Burkina Faso het ’n volledige span gehad met feitlik ál hul spelers wat in Europa se voorste ligas speel, maar hulle kon eenvoudig net nie die bal in die hande kry nie!”
Die Suid-Afrikaners, wat 10 plekke laer is as die besoekers op die wêreldranglys, was van meet af aan in beheer van sake.
Bafana Bafana het so byna in die derde minuut voorgeloop.
Siboniso Gaxa se skitterpoging van ver buite die besoekers se doelgebied is net-net deur German Sanou, die besoekers se doelwagter, weggeklap.
Sanou het enkele minute later hulpeloos toegekyk toe ’n vryskop deur die Bafana-doelskieter Katlego Mphela verby sy uitgestrekte hande geseil en agter in die doelhok geklap het.
Siphiwe Tshabalala, Bafana se waarnemende kaptein, het dit 2-0 gemaak toe hy ’n perfekte terugaangeë van Thulani Serero weggebêre het.
Serero, in net sy tweede wedstryd in die Groen-en-Goud, was ook instrumenteel in Bafana se derde doel, en Mphela se tweede, toe hy die Burkina Faso-verdediging met ’n eksieperfeksie lang aangeë oopgekloof – en Mphela vir Sanou aan sy regterkant geklop – het.
Daarmee het Killer, soos Mphela bekend staan, sy doeltotaal tot 21 opgestoot.
Hy het net die derde Suid-Afrikaanse speler tot nog toe geword wat meer as 20 keer die doelnet op die wêreldverhoog laat bult het.
Vir die jongste sportnuus volg Nuus24Sport op Twitter.
– Sport24