'Bring jou eie kondome na WB'
2009-11-18 14:25
Kaapstad – Nederlandse sokkerondersteuners is gevra om hulle eie kondome saam te bring wanneer hulle volgende jaar Suid-Afrika toe kom vir die Wêreldbeker-toernooi.
Nederland se sokkerspan was een van die eerste spanne wat gekwalifiseer het om aan die wêreldbekertoernooi deel te neem.
Daarom word voorbereiding vir dié groot geleentheid reeds getref om sowat 12 000 aanhangers se besoek aan Suid-Afrika so sorgeloos moontlik te maak.
Met Suid-Afrika wat glo ‘n tekort aan kondome het, het Marietta Bussemaker, die minister van gesondheid en sport haar landsburgers aangeraai om voorsorg te tref.
“Dit is nie my idée nie, maar ‘n organisasie in Kaapstad wat help om die verspreiding van MIV/Vigs te voorkom,” het sy gesê.
“Hulle het vir my gesê dit kan moontlik een van die probleme wees wat tydens die Wêreldbeker kan opduik. Ek dink dit is ‘n goeie voorstel dat besoekers hul eie kondome moet saambring.
"As jy dink jy gaan hulle nodig kry, bring saam om jouself teen MIV te beskerm.”
-Sport24