Brasilië kom leer by SA
2009-09-01 18:14
Pretoria – ‘n Top Brasiliaanse afvaardiging het Suid-Afrika besoek om meer te leer oor die prosesse en vereistes wat benodig word om die wêreldbeker aan te bied, het die 2010 Wêreldbeker organiseringskomitee Dinsdag gesê.
Woordvoerder Rich Mkhondo het gesê dat die afvaardiging, wat deur Blairo Borges Maggi, Mato Grosso staat se goewerneur gelei word, Maandag met Danny Jordaan, die organiseringskomitee se hoof uitvoerende bestuurder, ontmoet het.
Hy het gesê dat die Brasiliane beïndruk was met die komitee se fokus op toerisme, infrastruktuur, die herbouing van Suid-Afrika en Afrika se beeld, werkskepping en groei in die klein tot medium besigheidsektor.
“Ons het amptelik met ons vergaderings in voorbereiding vir 2014 begin en ons is gereed om by Suid-Afrika te leer,” het Maggi na die vergadering gesê.
“Wat regtig belangrik is, is dat ons met die administrasie ontmoet en dat hulle vir ons sê wat die beste werk.”
Brasilië gaan in die 2014 die Wêreldbeker aanbied.
“Hierdie land gaan verbetering in sokker sien – beter stadions, oefenvelde en televisie-uitsending. Dit is in realiteit die middelpunt van sokker se ekonomie,” het Jordaan aan die Brasiliaanse afvaardiging gesê.
“Tot 85% van sokker se ekonomie is in Europa. As Brasilië en Suid-Afrika ‘n basis van wêreldklas infrastruktuur kan bou, asook uitsending en telekommunikasie verbeter, kan ons in my opinie ‘n sentrale sokker ekonomie in die Suidelike halfrond ontwikkel.”
Brasilië is slegs die vyfde land wat die FIFA Wêreldbeker twee keer sal aanbied en dit is die eerste keer wat die toernooi twee keer na mekaar in die suidelike halfrond aangebied gaan word.
- Sapa