Benni sê nee dankie vir R11,5 miljoen
2011-02-03 09:28
Johannesburg - Die voormalige Bafana Bafana-swaargewig Benni McCarthy is in ’n stryd met West Ham United gewikkel.
Dié 33-jarige doelskieter is nie tussen die groep van 25 spelers wat in die oorblywende wedstryde in die Engelse Premierliga sal speel nie. Dié sukkelende klub het hom glo R11,5 miljoen aangebied om vrywillig weg te stap.
McCarthy, wat meer as R30 miljoen in sy oorblywende 18 maande by die Hammers kan verdien, het dit van die hand gewys.
Hy verdien bykans R440 000 per week en is ’n geweldige las vir dié klub, want hy het sedert Januarie 2010 net 326 minute gespeel en kon nie ’n doel aanteken nie.
Daar was sprake dat hy na Queens Park Rangers sou skuif. Hy het in ’n proeflopie vir QPR ’n doel aangeteken, maar geen aanbod is nog aan hom gedoen nie.
McCarthy kan dalk volgende week aan een van die spanne in die Kampioeneliga geleen word, maar volgens ’n Britse dagblad is daar klubs in die Midde-Ooste wat in hom belang stel.
Vir die jongste sportnuus volg Nuus24Sport op Twitter.
- Sport24