Benni dalk oplossing vir doeledroogte
2009-09-10 08:33
Jaco van der Merwe
Johannesburg - Benni McCarthy het nie ’n towerstaf in sy sokkerstewel waarmee hy Bafana Bafana se doeledroogte gaan breek nie.
Maar die enigste Suid-Afrikaanse doelskieter met ’n bewese internasionale doelerekord se insluiting sal die eerste stap in die regte rigting wees vir die vuisvoos Bafana aan die vooraand van die Wêreldbeker-toernooi.
Terwyl meneer-spanne van regoor die wêreld straks nie plek in die die skouspel gaan kry nie, ploeter Bafana voort soos ’n klomp wat allermins ’n plek tussen die wêreld se elite verdien. Die nederlaag van 0-1 teen Ierland eergisteraand in Limerick was die sesde agtereenvolgende wedstryd waarin die nasionale span slae gekry het.
Die afrigter, Joel Santana, kan die feit dat vier van die nederlae teen spanne was wat onder die top-vyf op die wêreldranglys tel as versagtende omstandighede vir die swak vertoningslys aanvoer. Maar selfs die koddige Brasiliaan sal hard moet spook om ’n verskoning te kry vir sy span se nederlaag teen die Iere.
Ierland se 38ste plek op die wêreldranglys is wel 35 plekke bo dié van Suid-Afrika, maar hy het ’n baie swak span teen Bafana losgelaat. Sonder sy vier mees ervare spelers het die hele Ierse span omtrent net soveel internasionale ervaring gehad as die Bafana-kaptein, Aaron Mokoena.
Bafana het die meeste besit gehad, maar daar was weer niemand wat kon afrond nie. Steven Pienaar en Elrio van Heerden, wat eindelik ’n kans gekry het, het spel in die middelveld beheer en die besoekers sonder moeite tot diep in die teenstanders se gebied geneem. Die twee skerpskutters, Katlego Mphela en Bernard Parker, kon egter net loskruit vuur met al die kanse wat die middelveldspelers geskep het.
Santana praat gereeld van die lesse wat sy span leer in die aanloop tot die Wêreldbeker-toernooi, maar miskien is dit hoog tyd vir hom om uit sy eie foute te leer en die omstrede McCarthy se insluiting te oorweeg. Veral nadat hy ’n ander lid van die “boksombende”, die doelskieter Mabhudi Khenyeza, nog ’n kans gegee het.
Santana kan op sy kop staan en verkondig dat Bafana ’n “goeie vierde plek” tydens die onlangse Konfederasiebeker-toernooi behaal het, maar ondersteuners is nie blind nie. Bafana het eintlik net vir Nieu-Seeland in die toernooi geklop, het nou ses wedstryde in ’n ry verloor en maak steeds net skandes teen Europese spanne.
En ook net vir u aandag, sénhor Santana: McCarthy was die laaste Bafana-speler wat ’n doel teen ’n Europese span op die vasteland kon aanteken. ’n Volle vier jaar en drie dae gelede in Bremen teen Duitsland.
– Sport24