Benni bring nuwe hoop vir Bafana
2009-11-10 10:16
Johannesburg - Blackburn Rovers se doelskopper Benni McCarthy is Bafana Bafana se ontbrekende skakel, meen Bafana doelwagter, Moeneeb Josephs, nadat McCarthy ná ses maande terug in die span verwelkom is.
Die terugkeer van McCarthy laat die hoop weer opvlam vir SA sokker.
Nuwe Bafana afrigter Carlos Alberto Parreira is besig om sy span voor te berei vir twee vriendskaplike wedstryde. Bafana sal Japan Saterdag in Port Elizabeth aanvat en volgende Dinsdag teen Jamaika in Bloemfontein speel.
McCarthy is in Mei vanjaar deur die voormalige afrigter Joel Santana uit die span vir die Konfederasiebeker-toernooi geskop as gevolg van ‘dissiplinêre redes’, maar Parreira het McCarthy met ope arms tot die span terug verwelkom.
"McCarthy bring nuwe lewe tot die span. Hy is ‘n leier as gevolg van sy persoonlikheid en ondervinding,” het Josephs gesê.
"Ek bedoel niks leliks teenoor enige van die ander doelskoppers in die span nie, maar Benni bring ‘n spesiale kwaliteit tot Bafana.”
Volgens Josephs het die span McCarthy se ondervinding en sy buitegewone manier om doele aan te teken, gemis.
“Ons almal weet waartoe Benni in staat is en ek meen hy die ontbrekende skakel tydens ons vorige wedstryde was,” het hy gesê.
Josephs is ook gelukkig daarmee dat Parreira terug is as hoofafrigter nadat die span vir 17 maande lank deur Santana afgerig is.
"Hy bring soveel kwaliteit en kennis tot die span, ek dink sy invloed sal gou begin wys,” het hy gesê.
- Sapa