Beckham terug vir Galaxy
2010-09-03 12:16
Los Angeles - Engeland se voormalige sokkerkaptein David Beckham het aangekondig dat hy vandeesmaand sy terugkeer tot die sokkerveld sal maak na 'n lang afwesigheid weens besering.
Hy sal op 11 September vir sy Amerikaanse klub, LA Galaxy, in 'n ligawedstryd teen Columbus Crew speel.
Beckham (35) het Donderdag op Galaxy se webtuiste gesê: “Ek wil graag vir Galaxy teen Columbus uitdraf en hou styf duimvas dat dit wel sal gebeur".
"Ek sal op die plaasvervangersbank wees en 15-20 minute speeltyd kry. Dit is waarna ek mik,” het hy gesê.
Dokters het aanvanklik gesê dat Beckham eers vanaf 1 Oktober weer aan wedstryde sal kan deelneem.
Hy het in Maart vanjaar in ‘n wedstryd vir AC Milan, 'n Achilles-besering opgedoen en moes ‘n lang rehabilitasie proses ondergaan voor hy op 11 Augustus aan oefensessies by Galaxy kon begin deelneem.
Beckham het sy besering as frustrerend beskryf, maar gesê dat hy ten spyte van sy ouderdom nog nie oorweeg het om sy sokkerstewels op te hang nie.
“Vra eerder my vrou daardie vraag. Om by die huis met ‘n besering te wees en nie te kan oefen of speel nie. Ek dink dit is erger vir haar as vir my,” het hy bygevoeg.
Fabio Capello, Engeland se afrigter, het vroeër gesê dat hy Beckham nie weer vir sy span sal oorweeg nie. Maar het onlangs opgemerk dat die deur op ‘n skrefie oop kan wees as die oud-kaptein se fiksheid en spelpeil goed genoeg is.
Bly op hoogte van al die jongste sportnuus deur Nuus24Sport op Twitter te volg.
- Sport24