Bafana voel druk
2010-08-31 07:51
Johannesburg - Die Suid-Afrikaanse sokkerspan dra maar swaar aan die gunsteling-etiket aan die vooraand van sy eerste kwalifiserende wedstryd vir die Afrikabeker-toernooi in 2012, sê Pitso Mosimane.
Dié Bafana Bafana-afrigter het gister erken dat die druk vierkant op die skouers van sy span sal wees wanneer hy Saterdag in die Mbombela-stadion in Nelspruit met Niger swaarde kruis.
Veral nadat Bafana pas twee van hul beste seges van die dekade behaal het.
Die Suid-Afrikaners het Frankryk, destyds op agt na die voorste span ter wêreld, in hul laaste wedstryd in die onlangse Wêreldbeker-toernooi verras en vroeër vandeesmaand boonop met Ghana, Afrika se vlagskip-span in die toernooi, afgereken.
“Gewoonlik het ons teenstanders nie veel respek vir ons nie en probeer hulle ons van die eerste sekonde af flenters hardloop,” het Mosimane gesê.
“Teen Frankryk en Ghana het dit in ons guns getel, aangesien dit oorgenoeg kanse geskep het vir ons om teenaanvalle te loods.”
Niger gaan egter ’n heel ander storie wees, het Mosimane gesê.
Die Wes-Afrikane beklee maar die 145ste plek op die nuutste ranglys van die Internasionale Sokkerfederasie (Fifa) – 79 plekke swakker as Bafana.
“Ek sou verkies dat hulle ’n soortgelyke benadering volg, maar ek verwag dat hulle eerder gaan terugsit en ons sal dwing om die speelwerk te doen.
“Hul eerste prioriteit gaan gewis wees om nie doele af te staan nie.”
Daarom gaan Jingles, soos Mosimane ook bekend staan, alle versigtigheid oorboord gooi.
“Dis ’n wedstryd wat ons eenvoudig net moet wen as ons ’n stewige kans wil hê om vir die Afrikabeker-toernooi te kwalifiseer,” het hy gesê.
“Die aantal doele wat jy vroeg in die kwalifiserende ronde aanteken, kom spook altyd later weer by jou.”
En met veel strawwer wedstryde, teen Sierra Leone en die Afrika-kampioen, Egipte, wat wag, kan Bafana niks minder nie as ’n doelefees bekostig.
“Die span se selfvertroue is hoog ná ons laaste twee wedstryde, maar daar was steeds heelwat haakplekke teen Ghana wat uitgestryk moet word,” het Mosimane gesê.
“Ons was uitstekend in die eerste helfte teen hulle, maar ons afronding en die uitvoering van ons vry- en hoekskoppe was maar vrotterig in die tweede helfte.”
Altesame 24 van Bafana se 25 spelers het hulle teen gisteraand reeds by die kamp aangemeld, met net Siboniso Gaxa wat nog sy opwagting moet maak.
Bly op hoogte van al die jongste sportnuus deur Nuus24Sport op Twitter te volg.
- Sport24