Bafana-sterre bly by Kaizer Chiefs
2010-08-19 08:52
Johannesburg – Kaizer Chiefs gaan nie hierdie seisoen enige van hul sokkersterre verkoop nie.
Bobby Motaung, bestuurder van Amakhosi, het Woensdag maande se bespiegeling oor vier top-spelers wat by buitelandse klubs sou aansluit, beëindig.
Volgens Motaung gaan Bafana Bafana se vleuel Siphiwe Tshabalala, nasionale doelwagter Itumeleng Khune, Zimbabwiese middelveldspeler Tinashe Nengomasha en Burundi-internasionale verdediger Valery Nahayo almal by die klub bly.
Tshabalala, wat tydens die wêreldbeker-sokkertoernooi geskitter het, het die teiken van menigte Europese klubs geword, maar volgens Motaung gaan Tshabalala nêrens heen nie.
“Ons het nog nie ‘n konkrete aanbod gekry nie en hy (Tshabalala) gaan by Chiefs bly,” het Motaung gesê.
“Dit geld vir die ander spelers ook. Ons gaan niemand laat gaan nie.”
Tshabalala sê hy is gelukkig daarmee om by Chiefs te bly. Hy is ook nie teleurgestel dat sy moontlike skuif na Europa nie gerealiseer het nie.
Bly op hoogte van al die jongste sportnuus deur Nuus24Sport op Twitter te volg.
- SAPA