Bafana-ster se plaasvervanger ook mank
2010-08-10 09:30
Johannesburg - Die beseringspook het Maandag wéér in die Bafana Bafana-kamp gedraai, aan die vooraand van dié span se wedstryd teen Ghana.
Orlando Pirates se belowende jong middelveldspeler Andile Jali sal straks môre se kragmeting in die Soccer City-stadion buite Soweto misloop nadat hy ’n enkel beseer het.
Dit het in die naweek se Telkom Charity Cup-eindstryd teen Kaizer Chiefs gebeur.
Hy is vroeër ingesluit as plaasvervanger vir nog ’n manke, Kagisho Dikgacoi, wat weens ’n dyspierbesering onttrek moes word aan die Suid-Afrikaanse afrigter, Pitso Mosimane, se groep van 22 spelers.
Tog het Mosimane gister gesê sy span is gerat vir die gevaarlike Black Stars, wat die kwarteindronde van die Wêreldbeker-toernooi in Julie in Suid-Afrika gehaal het.
Die Wes-Afrikane het gister in die land aangekom, met die meeste van hul WB-brekers – onder wie Asamoah Gyan en Kwadwo Asamoah.
“Bestendigheid is ons groot mikpunt vir dié wedstryd,” het Mosimane gesê.
“Ons weet waartoe Ghana in staat is, maar ek glo ons kan hulle klop.”
Hy wag steeds op MacBeth Sibaya en Anele Ngcongca, wat hulle eers vandag by die span sal aansluit nadat hulle die naweek nog vir hul klubspanne in onderskeidelik Rusland en België uitgedraf het.
Volgens Mosimane sal dié kragmeting dien as voorbereiding vir die Suid-Afrikaners se eerste kwalifiserende wedstryd vir 2012 se Afrikabeker-toernooi, aanstaande maand teen Niger.
“Ghana is heelwat sterker as Niger en daarom is dit belangrik dat ons onsself Woensdag (môre) laat geld,” het hy gesê.
“Dis belangrik om te wen, maar terselfdertyd wil ek speelkans gee aan soveel moontlik van die ouens sodat ek weet wat hulle bied.”
Met Bafana se ster-verdediger Bongani Khumalo steeds op die krukkelys, sal Mosimane straks sy kaptein, Aaron Mokoena, Morgan Gould, Siyabonga Sangweni én Bevan Fransman inspan.
Dié 46-jarige breier het ook volgehou dat die deur na die Suid-Afrikaanse span steeds oop is vir die omstrede 32-jarige doelskieter Benni McCarthy, wat kort voor WB 2010 weens ’n dissiplinêre oortreding weggelaat is.
Matthew Booth en Siyabonga Nomvethe is nóg twee Wêreldbeker-hardebaarde wat die trekpas gekry het.
“Die deur is steeds oop vir enige speler en as ek voel dat hy ons kan help om wedstryde te wen, sal ek hom kies.
“Dis egter belangrik om te onthou dat Benni 36 sal wees met die volgende Wêreldbeker-toernooi (in 2014 in Brasilië).”