Bafana-spelers ook skuldig
2009-10-15 09:55
Jaco van der Merwe
Johannesburg - Die lang messe word vir die nasionale sokkerafrigter Joel Santana geslyp, maar oud-spelers sê die afdanking van dié Brasiliaan waarborg nie ’n wenspan nie.
Bafana Bafana is minder as nege maande voor die Wêreldbeker-toernooi met die rug teen die muur ná hul droewige vertoningslys die afgelope drie maande.
Bafana het hul agtste nederlaag in nege wedstryde vandeesweek teen Ysland gely, wat 23 plekke onder Suid-Afrika op die wêreldranglys is.
Die Suid-Afrikaanse Sokkervereniging (Safa) het Santana voor die wedstryd die versekering gegee dat hy minstens nog in aanstaande maand se twee wedstryde teen Japan en Jamaika in die stoel sal bly, maar die vrot vertoning teen Ysland kan sy moontlike afdanking bespoedig. Veral ná gerugte dat sy voorganger en landgenoot Carlos Parreira binnekort weer die leisels gaan oorneem.
Twee gewese Bafana-sterre, Mark Fish en André Arendse, het aan Sport24 gesê dat Santana se afdanking nie noodwendig ’n kitsresep vir welslae sal wees nie. Hulle glo dat Safa en die spelers ook ’n aandeel in die geploeter het.
Dís wat Fish en Arendse te sê gehad het:
Is Bafana se spelers goed genoeg?
Fish: Dit is alewig die afrigters wat in die spervuur is as die span nie welslae behaal nie, maar die spelers se vermoëns is nooit ter sprake nie. Ons sal nooit weet of hulle goed genoeg is, die afrigter se taktiek swak is en of die spelers takties bloot nie opgewasse is nie.
Arendse: Ons vertonings in die Konfederasiebeker-toernooi getuig daarvan dat ons wél die spelers het. Ons sou nooit dié toernooi gewen het nie, maar ons het goed met die wêreld se beste spanne meegeding.
Maar nou het ons ’n insinking beleef en skielik maak die verdedigers nie meer skoon nie, ons stuit nie aanvalle in die middelveld nie en teken nie doele aan nie.
Safa, die afrigtingspan en die spelers sal ’n oplossing moet vind en vinnig ook.
Het Santana rede tot kommer?
Fish: As hy afgedank word, moet dit nóú gebeur. Dit help nie om in die wedstryde teen Japan en Jamaika voort te ploeter as daar reeds ’n nuwe afrigter teen daardie tyd kan wees nie.
En as ons Japan met 1-0 met ’n strafdoel klop? Dit sal sekerlik nie genoeg vir hom wees om sy werk te behou nie.
Arendse: Dit is nie goed vir ’n span om kort voor ’n Wêreldbeker-toernooi van afrigter te verwissel nie, maar dis geen waarborg nie. In 2002 het Safa vir Carlos Queiroz kort voor die Wêreldbeker-toernooi afgedank en met Jomo Sono vervang.
Moet Parreira weer die leisels oorneem?
Fish: Parreira het ’n span gebou wat met trots gespeel het. Hy ken die spelers en Safa kan swakker besluite neem as om hom terug te bring.
Arendse: As hy regtig die wil en die passie gehad het, sou hy nooit die pad gevat het nie. Dit is belaglik om te dink dat Bafana hom nou wil terug hê.
Moet Bafana hul net wyer gooi en Amajita se o.20-sterre ’n kans gee?
Fish: Ek kan nie sien waarom Bafana nie ’n paar van die o.20-spelers ’n kans in die wedstryde teen Japan en Jamaika kan gee nie. As jy goed genoeg is, is jy oud genoeg.
Arendse: Dit help nie hulle karring nou met Bafana se groep nie. Dié outjies sal nog hul kans by die volgende Wêreldbeker-toernooie kry.
- Sport24