Bafana se middelveld-ster nie teen Ghana
2010-08-09 11:11
Johannesburg - Bafana Bafana se voorbereiding vir Woensdag se vriendskaplike wedstryd teen Ghana is die naweek geknou, toe Kagisho Dikgacoi aan dié span onttrek moes word.
Dié 25–jarige middelveldspeler van die Engelse klubspan Fulham was een van die Suid-Afrikaners se mees indrukwekkende spelers in die onlangse Wêreldbeker-toernooi, maar sal die wedstryd teen die Black Stars weens ’n dyspierbesering misloop.
Hy is reeds deur Orlando Pirates se jong Andile Jali vervang vir dié kragmeting wat om 20:30 op Soccer City begin.
Bafana het gister in Sandton saamgetrek om te slyp vir die hoogaangeskrewe Wes-Afrikane, wat laasmaand net die derde span van dié vasteland geword het om die kwarteindronde in sokker se grootste skouspel te haal.
Die Black Stars is op 22 na die voorste span ter wêreld – ’n stewige 43 ranglysplekke hoër as Bafana (66ste).
Pitso Mosimane het vandeesweek, op die vooraand van sy eerste wedstryd sedert hy as Suid-Afrikaanse afrigter by Carlos Alberto Parreira oorgeneem het, gesê ’n sege “sal die weg baan” vir Bafana se aanslag op ’n plek in die Afrikanasiesbeker-toernooi in 2012.
“Die uitslag is nie so belangrik soos die manier waarop ons speel nie, maar ’n nederlaag kan dinge moeilik maak – veral omdat ons ondersteuners verwag dat ons dié wedstryd sal begin, soos ons in ons laaste een teen Frankryk gespeel het,” het Mosimane gesê.
Hy het vroeër vandeesweek verras deur die 26-jarige Sthembiso Ngcobo in te sluit as ’n derde doelskieter, ondanks die feit dat dié Kaizer Chiefs-aanwins ’n louwarm seisoen beleef het vir Free State Stars in verlede seisoen se Premier-sokkerliga (PSL).
Ngcobo was die naweek een van die Amakhosi se groot uitblinkers in die Telkom Charity Cup-toernooi en het die wendoel aangeteken in die doodsnikke van Chiefs se halfeindstryd teen Mamelodi Sundowns, om sy span se plek in die titelstryd teen Orlando Pirates te bespreek.
Chiefs het dié wedstryd, op ’n volgepakte Soccer City, met 4-3 gewen danksy ’n strafdoelstryd, nadat Lucky Khune vroeg aan hulle die voortou besorg het.
Sy venynige poging het die bekkige Bucanneers en Bafana-doelwagter, Moeneeb Josephs, sprakeloos gehad; voordat Lucky Lekgwati in die 55ste minuut die gelykmaker behaal het, met ’n goed-gemikte kopskoot.
Intussen het Mosimane vroeër onthul dat hy op soek is na ’n tweede hulpafrigter.
Jairo Leal is sy regterhand, maar Mosimane stel glo belang daarin om die dienste te bekom van Simon Ngomane, sy voormalige hulpafrigter by SuperSport United.
“Leslie (Sedibe, uitvoerende hoof van die Suid-Afrikaanse sokkervereniging) het my reeds verseker dat dié aanstelling eersdaags gemaak sal word,” het Mosimane gesê.
Sport24.com