‘Bafana kan nóg beter’
2010-08-15 10:45
Johannesburg - Bafana Bafana se eerste kwalifiserende wedstryd vir die Afrika-nasiesbeker-toernooi sal om meer as net een rede ’n waterskeiding wees vir dié span.
Wanneer Pitso Mosimane-hulle op 5 September op die Mbombela-stadion in Nelspruit teen Niger uitdraf, sal hy vir die eerste keer sedert die begin van die Wêreldbeker-toernooi die onbekende etiket as gunsteling dra.
“Dit gaan ’n heel ander uitdaging wees as teen Ghana,” het Mosimane gesê, kort nadat Bafana vandeesweek op die ENB-stadion (voorheen Soccer City) met die Black Stars afgereken het.
Volgens Mosimane het hy reeds videomateriaal van dié Wes-Afrika-span se onlangse wedstryd teen Nigerië bestudeer. “Ghana het gedink hulle gaan ons van die eerste fluitjie af van die veld af hardloop. Dié ingesteldheid het ons verdediging beproef, maar terselfdertyd het dit ook aan ons die geleentheid gegee om hulle met teen-aanvalle onder druk te plaas.”
Een hiervan het aan Bafana hul wendoel besorg, toe Steven Pienaar die ongeorganiseerde Ghana-verdediging kort voor die rustyd met ’n briljante deur-aangee oopgekloof en skerpskutter Katlego Mphela manjifiek afgerond het.
“Niger verkies om terug te sit en te verdedig en dit het Nigerië oneindig gefrustreer. Teen hulle sal almal verwag dat ons moet wen en daarom sal ons ál die speelwerk moet doen,” het Mosimane gesê.
“Hulle het boonop ’n paar goeie spelers wat in goeie Europese ligas speel, so dit gaan beslis nie maklik wees nie.” Daarom kan die Suid-Afrikaners nie bekostig om oorgerus te raak nie, sê hy. “Dit was belangrik om ons eerste wedstryd te wen, maar daar is nog vreeslik baie ruimte vir verbetering.
“Ons verdediging was skaflik, maar veral in die tweede helfte – toe Ghana ’n tweede doelskieter saam met (Asamoah) Gyan ingespan het – het ons met terug-aangeë eenvoudig hopeloos te veel druk geplaas op Itumeleng (Khune, die Bafana-doelwagter).
“As ons ordentlik verdedig, behoort hy nooit soveel keerpogings te hê nie.”
Die span se fiksheid is nóg ’n kwelpunt. “Dit sou onrealisties wees om te verwag dat die spelers in dieselfde fisieke toestand sou wees as tydens die Wêreldbeker, aangesien hulle vir omtrent ’n maand feitlik niks gedoen het nie.
“Dit het my gedwing om meer plaasvervangers op te stuur in die tweede helfte as wat ek graag wou en het ons ritme versteur.
“Hopelik sal hulle heelwat fikser en skerper wees as hulle eers ’n paar wedstryde in die PSL (Premier-sokkerliga) gespeel het.”
Volgens hom was die verblydendste van dié vertoning die nuutgevonde slaankrag wat Bafana voorlangs gehad het, met die doelskieters Mphela en Bernard Parker.
“Dit is een van die dinge waaroor ek bekommerd was, want ek is nie ’n voorstander daarvan om Killer (Mphela) alleen voor in te span nie,” het Mosimane gesê.
“Ons sal ook ons kanse beter moet benut; dis een ding om in ’n vriendskaplike wedstryd kanse te verbrou, maar iets heeltemal anders wanneer daar werklik iets op die spel is – soos ’n plek in die Afrika-nasiesbeker-toernooi.”