'Bafana-doelskieter nie kitsoplossing'
2010-11-16 09:09
Kaapstad – Die Leeds United-doelskieter Davide Somma is nie veronderstel om ’n kitsresep te bied om Bafana Bafana se vermoëns voor die doelhok reg te ruk nie, het Suid-Afrika se sokkerafrigter, Pitso Mosimane, Maandag hier gesê.
Die 25-jarige Somma, wat pas ’n driejaar-kontrak met die Elland Road-klub geteken het, is in die Bafana-groep wat Woensdag hier teen die Verenigde State te staan kom in die Nelson Mandela-uitdaagwedstryd.
“Somma is deel van my poging om die nasionale span se spelersgroep te vergroot,” het Mosimane gesê.
Mosimane het in Julie die leisels by Carlos Alberto Parreira oorgeneem.
“Ek verwag nie dat hy al ons probleme moet uitsorteer nie, maar dis ’n goeie geleentheid vir hom. Hy’s ’n goeie speler en het die laaste ruk heelwat doele vir Leeds geskiet. Hy’t ’n goeie liggaam, ’n goeie kop en sy beweging sonder die bal is baie goed,” het Mosimane gesê.
Somma is van Italiaanse afkoms en is aan die Oos-Rand gebore.
Hy het as kind na die VSA geëmigreer en het sokker daar en in Spanje gespeel. Hy is later na Italië waar hy by verskeie klubs diens gedoen het voordat hy terug na Amerika is om in die MLS te speel.
Verlede jaar is hy na Engeland waar hy die owerstes by Leeds beïndruk het en die vyfde Suid-Afrikaner geword het wat vir dié klub teken.
Die ander was Gerry Francis, Albert Johanneson, Lucas Radebe en Phil Masinga.
Mosimane het video-opnames van Bafana se mees onlangse wedstryde na Somma gestuur sodat die doelskieter vertroud kan raak met hul speelstyl.
“Ons tegniese span het hom die opnames laat kry en nou werk ons hard daaraan om hom in te burger. Dit sal hom help om gouer te verstaan wat ons doen. Ek soek nie noodwendig ’n doel van hom nie, net ’n goeie bekendstelling in die nasionale span,” het Mosimane gesê.
Bafana Bafana sal vanoggend voltallig wees as Bevan Fransman van Hapoel Tel Aviv sy opwagting maak.
“Daar is weliswaar net een en ’n halwe dag om behoorlik voor te berei, maar dit behoort nie te verhinder dat ons volgens ons gewone styl speel nie – ’n styl waarvan mense sal hou.
“Dis ’n amptelike Fifa-wedstryd en ons respekteer dit as sulks, nes ons ons voormalige president Mandela respekteer. Dit sal ’n invloed hê op waar ons op die wêreldranglys is.
“En ons speel teen die VSA. Dis nie ’n hierjy-span nie, maar ’n gerekende een met goeie strategie en goeie taktiese dissipline,” het die breier gesê.
Die Amerikaners het eergistermiddag in die Kaap aangekom en gisteroggend in ’n gimnasium geoefen voordat hulle gistermiddag in die Kaapstad-stadion geoefen het.
Bafana Bafana het ’n ligte oefening in Philippi gehad.
Bly op hoogte van al die jongste sportnuus deur Nuus24Sport op Twitter te volg.
- Sport24