Bafana-breier waarsku
2010-07-16 07:01
Johannesburg - Pitso Mosimane wil geen gunste van sy “nuwe” werkgewer hê nie, maar dan moet sy spelers ook nie verwag om langer gepamperlang te word nie.
Die 45-jarige Mosimane is Donderdag as die nuwe Suid-Afrikaanse sokkerafrigter – die 17de in 18 jaar – aangewys nadat Carlos Alberto Parreira die tuig neergelê het ná Bafana Bafana se mislukte Wêreldbeker-veldtog.
En Mosimane, wat in 2006 as hoofafrigter waargeneem het en die afgelope drie jaar Parreira se regterhand was, het sommer reeds met die intrapslag gewaarsku dat hy nie “baantjies vir boeties” sal duld nie.
“Elkeen moet homself opnuut bewys en ek is geen uitsondering nie,” het Mosimane aan Sport24 gesê.
“Uitslae is al wat tel in sokker en ek verwag dat ek net beoordeel sal word aan hoe die span onder my vaar.”
Hoewel hy ’n kontrak van vier jaar met die Suid-Afrikaanse Sokkervereniging (Safa) onderteken het, kan dit opgeskort word as Bafana nie vir die Afrikabeker- en die Wêreldbeker-toernooi in onderskeidelik 2012 en 2014 kwalifiseer nie.
“Ek is nie hier om die appelkar om te keer nie, maar ek sal ook nie huiwer om veranderinge aan te bring as dit nodig is nie.”
Volgens hom staan die deur na die nasionale span steeds oop vir ’n speler soos Benni McCarthy, wat weggelaat is uit Bafana se Wêreldbeker-groep ná sy beweerde gefuif in die spanhotel in Sandton.
“Bestendigheid is nou belangrik en daarom sal ek nie sommer karring aan my afrigtingspan nie.”
Dit beteken dat Jairo Leal, nog een van Parreira se hulpafrigters, en die fiksheidskundige, Francisco Gonzalez, sal aanbly.
Bafana speel reeds op 11 Augustus in ’n vriendskaplike wedstryd op Soccer City teen Ghana, waarna die span sy aanslag op ’n plek in die Afrikabeker-toernooi in die Mbombela-stadion in Nelspruit teen Niger begin.
- Sport24
Bly op hoogte van al die jongste sportnuus deur Nuus24Sport op Twitter te volg.