Bafana begin 2014-veldtog
2010-08-04 07:41
Johannesburg - Bafana Bafana moet géén gunste verwag van Ghana nie wanneer dié spanne aanstaande week in ’n vriendskaplike sokkerwedstryd slaags is.
Trouens, sou die Black Stars met enigiets minder as hul sterkste span in die Socer City-stadion opdaag, sál hulle op die vingers getik word.
Só het Leslie Sedibe, uitvoerende hoof van die Suid-Afrikaanse Sokkervereniging (Safa), gister gesê oor Bafana se eerste wedstryd ná hul mislukte Wêreldbeker-veldtog – en Pitso Mosimane se eerste as afrigter.
Volgens Sedibe wag ’n vuurdoop op Carlos Alberto Parreira se opvolger, nadat Ghana so byna die eerste Afrika-span tot nog toe geword het wat die halfeindronde van die Wêreldbeker-toernooi haal.
“Ons het dit duidelik gemaak dat ons ’n volsterkte span verwag, met die kern van die spelers wat so goed vertoon het in die Wêreldbeker-toernooi,” het Sedibe gesê.
“Ghana was tevrede met die ooreenkoms en het aanvaar dat hy streng beboet sal word, sou hy nie aan dié eis voldoen nie.”
Mosimane het reeds gesê verskeie jongelinge sal vir die kragmeting gekies word, ten einde die span te herbou vir die volgende WB-toernooi – in 2014 in Brasilië.
Dít kan beteken dat die koppe van hardebaarde soos Aaron Mokoena, Bafana se Wêreldbeker-kaptein en mees ervare speler, Matthew Booth, Benni McCarthy en Surprise Moriri finaal kan rol.
Terselfdertyd kan groentjies soos Siyanda Xulu, Siya¬bonga Sangweni, Thanduyise Khuboni, Daylon Claasen en Kermit Erasmus ingespan word.
“Die klem is op 2014, maar ek wil hulle geleidelik deel maak van die span en aan sokker op dié vlak blootstel,” het Mosimane verlede week gesê.
“Dit sal dom wees om eensklaps van ál die ervare spelers ontslae te raak.”
Daarom sal MacBeth Sibaya straks speelkans kry.
Dié 32-jarige middelveldspeler het gister aan kickoff.com bevestig dat hy gevra is om hom later die week by die Bafana-kamp aan te sluit.
Hy was een van die span se groot uitblinkers in die WB-sege van 2-1 oor Frankryk in Junie in Bloemfontein.
“Ek het ’n brief ontvang van Safa, wat sê dat ek gekies is,” het Sibaya vanuit Rusland, waar hy vir die klubspan Rubin Kazan speel, gesê.
“Dis uitstekende nuus, aangesien ek duidelik deel is van Pitso se planne.”
Bly op hoogte van al die jongste sportnuus deur Nuus24Sport op Twitter te volg.
- Sport24