'Wallaby-afrigter niks beter as 'n provinsiale breier'
2012-08-23 12:33
In-diepte Verslae
Die Nieu-Seelandse rugbyunie het die All Blacks se Rugbykampioenskap-titel met 'n openbare tentoonstelling
van die span se trofeekas gevier.
Wellington – 'n Voormalige breier van die Wallabies, Alan Jones, sê dit is bokant Robbie Deans se vuurmaakplek om Australië suksesvol af te rig.
Jones, wat die Wallabies vanaf 1984 tot 1987 gebrei het, bestempel Deans as 'n "provinsiale afrigter" wat die talent tot sy beskikking vermors.
Hy het op die vooraand van die tweede Bledisloe-toets tussen die Wallabies en die All Blacks in 'n onderhoud met Nieu-Seeland se LiveSport in Sydney gesê: "Ons span word swak afgerig, daar is geen beter manier om dit te stel nie. Soms is dit beter om glad nie afgerig te word nie as om swak afgerig te word."
"Die hele stelsel is 'n mislukking en die spelers ly daaronder...basies, op hierdie vlak...is hy [Deans] nie daarvoor opgewasse nie."
Australië se laaste oorwinning op Eden Park, waar Saterdag se toets gespeel word, was in 1986 toe Jones die afrigter was.
Jones het gesê sukses word op 'n stabiele beginspan gebou en hy het Deans gekritiseer vir die wyse waar hy met die span se kombinasies, sedert sy aanstelling in 2007, peuter en spelers met instruksies oorlaai.
Hy het Deans ook daarvan beskuldig dat hy die Wallabies se tradisionele aanvallende spel versmoor.
In antwoord op 'n vraag oor die raad wat hy aan Deans sal gee het Jones geantwoord: "Sit die spelers op die veld en laat hulle dit organiseer...hou jou mond en bly by die huis in die bed."
Jones, wat 'n radio-geselsprogram in Sydney aanbied, het ook iets te sê gehad oor Deans se nasionaliteit en sê 'n Nieu-Seelander moes nooit in beheer van die Wallabies gewees het nie.
"Wie de hel het 'n Nieu-Seelander uitgenooi om Australië af te rig? Dit is belaglik," het hy gesê.
Hy het gesê Deans se min sukses met Australië bewys dat sy rekord van vyf Super-rugbytitels met die Canterbury Crusaders eerder as gevolg van die All Black-belaaide span is as sy afrigtingstalent.
"Sommige mense is provinsiale afrigters en dit is oukei. Aan die ander kant toe hy Canterbury afgerig het het hy die meeste van die All Blacks in sy span gehad...jy kan duidelik sien dit gaan oor meer as net die ou wat in beheer is."
Vir die jongste sportnuus volg Nuus24Sport op Twitter.
- Sapa - AFP
