'Swak dissipline het ons gekos' – Heyneke
2012-09-15 23:00
In-diepte Verslae
Die Nieu-Seelandse rugbyunie het die All Blacks se Rugbykampioenskap-titel met 'n openbare tentoonstelling
van die span se trofeekas gevier.
Dunedin – Die Springbok-afrigter, Heyneke Meyer, het belowe dat daar teen Dean Greyling opgetree sal word nadat die plaasvervanger-stut 'n geelkaart gekry het in Saterdag se nederlaag teen die All Blacks.
Meyer meen dié voorval, waar Greyling vir Richie McCaw met die voorarm in sy gesig gestamp het, het die Springbokke die wedstryd gekos.
Hy het onmiddelik na afloop van die wedstryd om verskoning gevra aan McCaw.
"Ek is baie ernstig oor dissipline en dit is onaanvaarbaar," het Meyer, wat voor die afskop sy bewondering vir die All Black-kaptein as "een van die beste spelers ooit" uitgespreek het, gesê.
"Ek dink dit het ons die wedstryd gekos en ek wil om verskoning vra aan Richie."
Die All Blacks het nou al vier hul Rugbykampioenskap-wedstryde gewen en is steeds bo-aan die punteleer terwyl Suid-Afrika na die derde plek gegly het.
In die eerste helfte het die Kiwi's gesukkel teen 'n vasberade Bok-span, wat rustyd met 5-3 voorgeloop het nadat Morné Steyn suksesvol was met slegs een van sy ses pogings na die pale.
Aaron Smith, wat die skrumskakel Piri Weepu in die tweede helfte vervang het, het die bal egter vinniger beskikbaar gestel aan sy agterlyn en die All Blacks het begin om die Suid-Afrikaanse verdediging af te breek.
En dit was ook Smith se drie in die 60ste minuut wat aan die Kiwi's die nodige momentum vir die res van die wedstryd gegee het.
Vir die jongste sportnuus volg Nuus24Sport op Twitter.
- AFP
