Meyer bekommerd oor beserings
2012-09-24 20:04
In-diepte Verslae
Die Nieu-Seelandse rugbyunie het die All Blacks se Rugbykampioenskap-titel met 'n openbare tentoonstelling
van die span se trofeekas gevier.
Pretoria – Die Springbok-afrigter Heyneke Meyer was Maandag bekommerd oor sy span vir Saterdag se belangrike Rugbykampioenskap-wedstryd teen Australië op Loftus Versfeld, met verskeie spelers wat met beserings sukkel.
Die span het ‘n week se rus geniet ná hul nederlaag van 21-11 teen die All Blacks in Nieu-Seeland twee weke gelede.
“Ek het gedink dat ons ná ‘n week van rus ‘n harde oefensessie met al 30 spelers kan hê,” het Meyer gesê.
“Daar was ‘n paar dinge wat ons wou insit, maar daar is ‘n paar beserings, ‘n paar van die Curriebeker en een of twee van vanoggend se oefensessie.”
Die spandokter, Craig Robberts, het Maandag gesê hy het ‘n besige dag gehad weens sommige van die beserings wat hy moes behandel.
Coenie (Oosthuizen) het ‘n algemene styfheid wat verwag kan word nadat hy vir ‘n ruk nie gespeel het nie. Jacques Potgieter het ‘n ligte liesbesering, wat hom uit die oefening gehou het en Lwazi (Mvovo) het ‘n stywe dyspier,” het Robberts gesê.
“Twee van die spelers wat oorsee gespeel het, sukkel nog. Flip van der Merwe het ‘n ligte kuitbesering, so hy het nie geoefen nie en Johan Goosen het ‘n beseerde hak, so ons behandel hom ook.”
Die grootste bekommernis Maandag vir Meyer was ‘n enkelbesering wat die binnesenter Frans Steyn in die oggendsessie opgedoen het.
Steyn het op krukke geloop om die gewig van die enkel, wat hy in die eerste vyf sekondes van die oefening beseer het, af te hou.
– Vir die jongste sportnuus volg Nuus24Sport op Twitter
- SAPA
