Jantjies, Taute opgeroep vir Bokke
2012-09-22 22:23
In-diepte Verslae
Die Nieu-Seelandse rugbyunie het die All Blacks se Rugbykampioenskap-titel met 'n openbare tentoonstelling
van die span se trofeekas gevier.
Kaapstad – Vier spelers is opgeroep vir die Springbokgroep van 30 vir die laaste twee toetse van die Rugbykampioenskap in Suid-Afrika teen Australië en Nieu-Seeland.
Die vier nuwe spelers in die span wat nie na Australasië getoer het nie, is die Leeus se Jaco Taute en Elton Jantjies, hulle provinsiale spanmaat CJ van der Linde en Coenie Oosthuizen van die Cheetahs.
“Ek wou nog altyd vir Jaco by die groep insluit maar 'n besering het beteken dat ons hom nie vroeër kon kies nie. Jaco is groot, sterk, vinnig en veelsydig en dit sal goed wees om hom betrokke te kry,” het Heyneke Meyer, die Springbok-breier, gesê.
“Elton was deel van die groep voor hierdie seisoen, teen Engeland in Junie en in die eerste deel van die Rugbykampioenskap. Hy het dit net gemis toe ons die aantal spelers op die groep moes sny, en dis goed om hom terug te hê.
“CJ, wat deelgeneem het aan ons oefenkampe vroeër in die seisoen, bring heelwat ervaring na die pak en hy het nie meer 'n besering nie. Behalwe dat hy die tweede mees ervare stut in Springbok-geskiedenis is, ná Os du Randt, is hy veelsydig en kan hy vaskop en loskop speel.
“En dis goed om vir Coenie terug saam met ons te hê ná hy 'n besering opgetel het in die eerste toets teen Engeland in Junie. Hy is 'n wêreldklasstut en dit was 'n groot terugslag om hom te verloor.”
JP Pietersen, Bjorn Basson, Pierre Spies, Siya Kolisi, Chiliboy Ralepelle en Bismarck du Plessis, wat vroeër vanjaar deel van die oefengroep was, is nie oorweeg nie weens beserings.
Só lyk die volledige Springbokgroep:
Willem Alberts - 15 toetse
Andries Bekker - 27
Craig Burden - 0
Pat Cilliers - 3
Marcell Coetzee - 7
Juan de Jongh - 10
Jean de Villiers (kaptein) - 79
Jannie du Plessis - 37
Eben Etzebeth - 6
Johan Goosen - 2
Bryan Habana - 81
Francois Hougaard - 22
Elton Jantjies - 0
Zane Kirchner - 19
Juandré Kruger - 5
Pat Lambie - 15
Tiaan Liebenberg - 3
Francois Louw - 12
Tendai Mtawarira - 39
Lwazi Mvovo - 7
Coenie Oosthuizen - 1
Ruan Pienaar - 58
Jacques Potgieter - 3
Frans Steyn - 53
Morné Steyn - 41
Adriaan Strauss - 16
Jaco Taute - 0
CJ van der Linde - 73
Flip van der Merwe - 18
Duane Vermeulen - 2
– Wat dink jy van die Springbokgroep? Sê jou sê in die kommentaarvenster hieronder of stuur jou mening na terugvoer@nuus24.com.
– Vir die jongste sportnuus volg Nuus24Sport op Twitter.
