All Blacks hou asem op oor Carter
2012-09-17 09:20
In-diepte Verslae
Die Nieu-Seelandse rugbyunie het die All Blacks se Rugbykampioenskap-titel met 'n openbare tentoonstelling
van die span se trofeekas gevier.
Kaapstad – Dan Carter sukkel steeds met 'n kuitbesering, maar sal straks saam met die All Blacks na Argentinië toer.
Die Kiwi's se agterlyn-afrigter, Steve Hansen, het Maandag gesê 'n besluit oor Carter se fiksheid sal kort voor die toergroep vir die laaste twee Rugbykampioenskap-toetse aangekondig word, gemaak word.
"Hy [Carter] hardloop nog nie voluit nie. Die mediese span dink Dan sal [oukei] wees, maar ons sal moet wag en kyk," het Hansen gesê.
"Ons behoort teen Vrydag 'n besluit te maak"
Hansen het gesê daar sal 'n paar moeilike besluite, wat die spankeuse betref, gemaak moet word as Carter sy fiksheidstoets slaag.
"[Om Beauden Barrett] te behou is 'n opsie wat ons het, maar ons het ook vyf stutte en mag dalk een van hulle by die huis los. Ons het ook 'n ekstra losvoorspeler wat tuis kan bly."
Hansen het gesê daar is nie ernstige beseringsnuus na die span se oorwinning oor die Bokke nie, maar Richie McCaw het 'n paar stampe weg.
"Richie is waarskynlik die seerste. Hy het 'n seer nek en 'n hematoom aan sy been, maar almal behoort na verwagting beskikbaar te wees om Saterdag te vlieg," het Hansen gesê.
Die All Blacks se volgende toets is op 30 September teen die Poemas in Rosario, Argentinië.
Vir die jongste sportnuus volg Nuus24Sport op Twitter.
