Bokke draai Hane nek-om
2010-06-12 15:51
Anja Carstens
Kaapstad - Die Springbokke het hul eerste toets sedert 2005 teen Frankryk gewen toe hulle die Hane Saterdag op Nuweland in Kaapstad met 42-17 vermorsel het.
Dit was 'n naweek wat die Franse eerder sal wil vergeet nadat die nasionale sokkerspan Vrydagaand gesukkel het in hul WB-groepwedstryd teen Uruguay. Dié wedstryd het 0-0 geëindig.
Die Springbokke was vinnig uit die blokke en het na 10 minute se speeltyd met 14 punte voorgeloop. Dit het die Hane bykans 30 minute geneem om punte op die telbord te sit nadat vleuel Aurelien Rougerie die besoekers se eerste drie gedruk het.
Die rustydtelling was 25-10 in die guns van die Bokke.
Alhoewel die tuisspan uitgestaan het in die lynstane, is daar weer in die skrums kleigetrap.
Rugbygeesdriftiges is met sewe drieë in die wedstryd bederf en dit was ook een van Nuweland se helde, die flank Francois Louw, wat een van die beste vertonings op die veld gelewer het.
Puntemakers:
Suid-Afrika: Drieë: Pierre Spies, Gio Aplon (2), Gurthrö Steenkamp, Francois Louw Doelskoppe: Morné Steyn (3), Ruan Pienaar Strafskoppe: Morné Steyn (3)
Frankryk: Drieë: Aurelien Rougerie, M Andreu Doelskoppe: Morgan Parra, David Skrela Strafskoppe: Morgan Parra
Die Springbokke speel volgende Saterdag teen Italië in Witbank.
Bly op hoogte van al die jongste sportnuus deur Nuus24Sport op Twitter te
volg.