Wys vuilspel dadelik uit, sê Freek
2012-11-09 10:29
Kaapstad – Die voormalige Suid-Afrikaanse skeidsregter Freek Burger het gesê wêreldrugby se beheerliggaam moet dit oorweeg om uitwysbeamptes tydens wedstryde te gebruik wat dadelik vuilspel kan uitwys.
Burger, tans 'n uitwysbeampte vir die Internasionale Rugbyraad (IRR), het gesê hy sal dié voorstel met skeidsregters in die Noordelike Halfrond bespreek wanneer hy in die volgende paar weke in dié deel van die wêreld diens doen.
Hy meen sy voorstel kan die tyd wat tydens ’n wedstryd gemors word, beperk, omdat 'n uitwysbeampte eerder as die TV-skeidsregter dan na ’n spesifieke voorval kan kyk.
“Jy wil aan die einde van die dag 15 spelers teen 15 spelers op die veld hê – maar jy kan nie toelaat dat iemand wat ’n rooikaart moes kry, op die veld bly nie,” het hy volgens Sport24 gesê.
Burger was die uitwysbeampte in die Bledisloe-kragmeting tussen Australië en Nieu-Seeland waarin Scott Higginbotham van die Wallabies die All Black-kaptein, Richie McCaw, met die knie teen die kop getref het en hom toe met die kop gestamp het.
“Ek het hom (Higginbotham) eers vier uur ná die wedstryd uitgewys. Maar as ek tydens die wedstryd deur die skeidsregter ingeroep is, sou ek dadelik kon sê ek het gesien hoe hy (Higginbotham) McCaw met die knie en toe met die kop stamp en ek beveel ’n rooikaart aan,” het Burger gesê.
– Lees hier meer.
– Vir die jongste sportnuus, volg Nuus24Sport op Twitter.
