Olivier dalk nie betyds vir Bulls-afskop
2013-01-10 12:45
Kaapstad – Die Springbok-senter Wynand Olivier, wat tans klubrugby in Japan speel, kan die Bulls se eerste twee Super-wedstryde misloop.
Olivier het die Bulls ná verlede jaar se Super-toernooi verlaat om by ‘n Japannese klub, die Ricoh Black Rams, aan te sluit.
Die Bulls se Superrugby-veldtog vir 2013 begin op 22 Februarie teen die Stormers, maar Olivier kan dalk die wedstryd misloop as sy Japannese klub kwalifiseer vir die uitspeelwedstryde wat in Februarie en Maart sal plaasvind.
Volgens ‘n ooreenkoms tussen die Ricoh Black Rams en die Bulls hoef Olivier eers op 1 Maart by die Bulls te rapporteer.
Frans Ludeke, afrigter van die Bulls, het aan Sport24 gesê dat hy later in die week met Olivier sal gesels om die saak op te klaar.
“As sake volgens plan verloop kan ons Wynand nog teen die einde van Januarie verwag. Ons gesels gereeld om na gelang van sy verpligtinge te kan beplan,” het Ludeke gesê.
Die Bulls het egter geen probleem met diepte op binnesenter nie.
Francois Venter het goed vertoon in die Curriebekerreeks en Jan Serfontein was verlede jaar tydens die IRR se Junior Wêreldbekertoernooi die speler van die toernooi.
Lees hier meer.
– Vir die jongste sportnuus volg Nuus24Sport op Twitter
