Will Genia bly by Wallabies

2012-11-23 18:00

Kaapstad – Die skrumskakel van die Wallabies Will Genia het 'n nuwe driejaar-kontrak met die Australiese rugbyunie (ARU) onderteken, het die unie Vrydag bevestig.

Genia is vroeër met 'n skuif na Japan verbind, maar die 24-jarige het spekulasie oor sy toekoms beëindig deur 'n kontrak tot 2015 met die Queensland Reds en die Wallabies te sluit.

Hy is besig om van 'n kniebesering te herstel en is nie deel van die Wallaby-groep wat tans in Europa toer nie.

"Dit is beslis waar ek wil wees – om vir Queensland en Australië te speel," het Genia gesê.

"My fokus is nou om my knie reg te kry, fiks te te word en dan op die veld te kom vir die Reds en die Wallabies."

"Volgende jaar is 'n groot jaar daar is groot dinge wat in Queensland gebeur en natuurlik kom die Britse en Ierse Leeus ook toer. Dit is beslis een van die redes hoekom ek gekies het om in Australië te bly."

Lees verder.

Vir die jongste sportnuus volg Nuus24Sport op Twitter.