Wilkinson tree uit toetsrugby
2011-12-12 21:56
Londen – Die legendariese Engelse losskakel Jonny Wilkinson het sy uittrede uit internasionale rugby Maandag aangekondig.
“Ek wil graag hierdie geleentheid neem om my uittrede uit internasionale rugby aan te kondig,” het Wilkinson in ‘n verklaring op sy webwerf, www.jonnywilkinson.com, gesê.
“Om dit te doen, maak my baie hartseer, maar ek weet ek was op soveel maniere geseënd om te kon ervaar wat ek met die Engeland-rugbyspan het,” het hy gesê.
Wilkinson het seker gemaak van sy plek in rugbygeskiedenis toe hy in ekstra tyd, met slegs sekondes oor, ‘n skepskop oorgesit het wat Engeland die wêreldbeker-eindstryd in 2003 teen Australië laat wen het.
Ná dié toernooi is hy egter deur ‘n reeks beserings geteister en by die onlangse wêreldbeker-rugbytoernooi in Nieu-Seeland het sy gewoonlik bestendige stelskopwerk hom in die steek gelaat. Engeland het in die kwarteindstryd teen Frankryk verloor.
Die 32-jarige Wilkinson tree uit as die Engelse speler wat nog die meeste punte in toetsrugby kon aanteken. Hy het 1 179 punte in 91 toetse aangeteken.
Hy het ook 67 punte in ses toetse vir die Britse en Ierse Leeus aangeteken op hul toere in Australië (2001) en Nieu-Seeland (2005).
Hy sal na verwagting sy klubloopbaan voortsit by die Franse span Toulon.
- Volg Nuus24Sport op Twitter
- AFP