Wie is die hongerste?
2011-10-29 07:05
Johannesburg – Op ’n straathoek hier in die middestad kyk twee honger mans na een sny brood bo-op ’n asblik.
Een het 12 dae laas iets geëet en die ander ’n dag gelede.
Watter een gaan dit eerste gryp?
Daar is nie net een antwoord op dié vraag nie, maar ’n mens sou tog sê die een wat die hongerste is.
Dieselfde rugbyscenario speel hom vandag op Coca-Colapark tussen die spanne van die Goue Leeus en die Haaie af.
Van swaarkry, bakhand-staan en met die krummels tevrede wees, kan ’n mens diegene wat Leeus-rugby oor die afgelope dekade ondersteun het, niks vertel nie.
Ook nie die spelers wat uitgehonger is vir Curriebeker-glorie nie.
Dit is hul kans om die Curriebeker die eerste keer in 12 jaar te wen – en die eerste keer op hul tuisveld sedert 1950.
Oud-spelers, ondersteuners en selfs die Leeus-afrigtingspan – John Mitchell, Carlos Spencer en Johan Ackermann – wens hulle kon help om die juk vandag te dra.
Maar dit is die 22 manne in die Rooibont-truie wat dit moet doen. Hulle word gelei deur Josh Strauss wat nog nie 40 eersterangse wedstryde op sy kerfstok het nie, maar wat agting afdwing en deur sy spelers amper soos ’n profeet gevolg word.
Die bebaarde Strauss en sy agttal het vandag een beduidende voordeel bo die fisieke voorspelers van die Haaie – hulle het vier maande lank as ’n eenheid in vanjaar se Curriebeker-reeks gespeel.
Eintlik het die proses om hulle in ’n eenheid saam te snoer al in verlede jaar se reeks onder Mitchell se afrigting begin.
Mettertyd het hul samespel verbeter. Strauss en die flanke, Michael Rhodes en Derick Minnie, vorm ’n vurige lostrio.
Minnie, wat vandag sy 25ste verjaardag vier, het Schalk Burger-hulle verlede week by die afbreekpunte laat huil.
Die Leeus se agttal is beweeglik en Mitchell verkies voorspelers wat die tempo hoog kan hou bo groot en swaar manne.
Min slotte dra die bal so baie en so doeltreffend soos Wikus van Heerden en Franco van der Merwe en dít het baie bygedra tot die Leeus se sukses vanjaar.
Agterlangs is die Leeus-kombinasies ook gevestig.
As die Haaie te veel op Elton Jantjies as potensiële wedstrydwenner gaan fokus, kan sy glibberige skakelmaat, Michael Bondesio, ongesiens deur ’n gaping of twee glip.
Op senter en vleuel verkies Mitchell vier betroubare en bestendige spelers. Met Alwyn Hollenbach, Doppies la Grange en Deon van Rensburg se verdediging skort daar niks nie.
Hollenbach begin as binnesenter ’n reputasie as ’n plettervatter bou – en dan wag Butch James boonop op die plaasvervangersbank...
As dit vandag reën, kan die aanvallende vermoëns van Michael Killian en Jaco Taute dalk beperk word.
Killian het ook al heelagter gespeel en saam met Taute kan hulle gevaarlike teenaanvalle loods.
Daar is dus balans in dié span: fisieke, maar beweeglike voorspelers; en agterspelers wat kan aanval én veral verdedig.
Die Rooibontes sal verder aangevuur word deur hul tuisskare in ’n stadion wat, wanneer hy vol is, soos vandag, enige besoekende speler se broek kan laat bewe.
Daar is dus genoeg redes waarom die Leeus vandag die Curriebeker kan wen. Maar die belangrikste rede wat die skaal gaan swaai, is dat die Leeus se span brullend honger is... hongerder as die Haaie.
– Vir die jongste sportnuus volg Nuus24Sport op Twitter.
– Sport24