Walliese slot pootjie eie span
2010-02-08 15:07
Londen. – ’n Oomblik van waansin deur die Walliese slot Alun-Wyn Jones het gehelp dat Engeland ’n wendroogte teen Wallis in die Sesnasies-reeks hier op Twickenham breek.
Jones is kort voor rustyd met ’n geel kaart gestraf nadat hy die Engelse haker Dylan Hartley gepootjie het en dit het die tuisspan ’n sege van 30-17 besorg.
Daarmee het Engeland ’n einde aan die Rooi Drake, wat die afgelope drie kragmetings tussen dié spanne in die reeks gewen het, se houvas gemaak.
Voor Jones se fout was die telling 3-3 en daarna het die Rose 17 punte opgestapel om 20-3 voor te loop.
Volgens Warren Gatland, breier van Wallis, was dit beslis die keerpunt.
“Dit was uiters dom wat hy gedoen het,” sê hy.
Gatland meen dit kan selfs die slot ’n plek in die span kos.
Martin Johnson, afrigter van Engeland, was verheug met die sege.
“Ek is tevrede met hoe die ouens gespeel het.
Ons het in die tweede helfte ’n insinking beleef en daar is baie waaraan gewerk kan word, maar om 30 punte teen Wallis aan te teken, gebeur nie elke dag nie.”
* Puntemakers:
Engeland: 30 (13): Drieë: James Haskell (2), Danny Care; Doelskoppe: Jonny Wilkinson (3); Strafdoele: Wilkinson (3).
Wallis: 17 (3): Drieë: Adam Jones, James Hook; Doelskoppe: Stephen Jones (2); Strafdoel: Stephen Jones.
* Ierland het Saterdag in ’n ander kragmeting in Dublin ’n onoortuigende sege van 29-11 oor Italië behaal.
Die kampioen se losskakel, Ronan O’Gara, het 16 punte aangeteken voordat hy die veld weens ’n besering moes verlaat.
Volgens David Wallace, Ierse flank en speler van die wedstryd, sal sy span beslis moet verbeter voordat hulle Frankryk Saterdag pak.
“Daar is ’n gevoel van tevredenheid omdat ons ’n taak gehad het om af te handel, dit gedoen het en vir 80 minute aangehou het,” sê hy.
* Puntemakers:
Ierland: 29 (23) Drieë: Jamie Heaslip, Tomas O’Leary; Doelskoppe: Ronan O’Gara (2); Strafdoele: O’Gara (4), Paddy Wallace.
Italië: 11 (8) Drie: Kaine Robertson; Strafdoele: Craig Gower, Mirco Bergamasco.
* Frankryk het gister in Edinburg sy kragmeting met Skotland met 18-9 gewen nadat die Hane met rustyd met 15-6 voor was.
– Sapa-AFP, Beeld