Wallaby-ster van aanranding aangekla

2012-06-16 23:00

Melbourne - Die polisie in Australië het die veelsydige Wallaby-agterspeler Kurtley Beale van aanranding aangekla ná 'n voorval buite 'n kroeg in Brisbane.

Beale (23) was glo in 'n vuisgeveg met uitsmyters buite die Victory-hotel, waar hy saam met sy spanmaat Quade Cooper gekuier het, betrokke.

"Die Queensland polisie het Kurtley Beale ingelig dat hy aangekla word van aanranding ná 'n beweerde voorval nege dae gelede in Brisbane," het die Australiese rugbyunie (ARU) Saterdag in 'n verklaring gesê.

"Gevolglik sal die ARU se eie dissiplinêre proses vir eers gestaak word totdat die eksterne ondersoek opgelos is."

"Tot dan sal Kurtley steeds beskikbaar wees om gekies te word vir Super-rugbywedstryde en toetse," het die verklaring gelui.

Beale en Cooper herstel albei tans van beserings wat hulle op die kantlyn gehou het vir die eerste twee toetse teen Wallis.

Die Wallabies het die eerste twee kragmetings gewen. Die derde en laaste toets word volgende Saterdag in Sydney gespeel.

Volg Nuus24Sport op Twitter.

- Reuters