Wallaby-heelagter in hof oor aanranding

2012-07-24 08:54

Brisbane – Kurtley Beale is borgtog toegestaan nadat hy Dinsdag in 'n hof in Australië verskyn het op aanklag van aanranding.

Die Melbourne Rebels-heelagter was na bewering in ‘n bakleiery met ‘n sekuriteitswag betrokke ná hy en sy Wallaby-spanmaat Quade Cooper nie toegelaat is by ‘n kroeg voor Australië se eerste toets teen Wallis vroeër vanjaar nie.

Beale se prokureur het aan die regter gesê sy kliënt en die beweerde slagoffer probeer om buite die hof te skik.

Die verhoor is vir agt weke verdaag vir onderhandelings tussen Beale en die sekuriteitswag.

Beale het Australië se twee toetse vroeër vanjaar teen Wallis weens ‘n besering misgeloop, hy was wel ingesluit vir die derde toets. Die Australiese rugby-unie(ARU) het Dinsdag gesê hulle moet nog met ‘n disiplinêre verhoor teen Beale begin.

“Die ARU sal nie met ‘n disiplinêre verhoor begin totdat die reg sy gang gegaan het nie,” het die beheerliggaam van die unie gesê.

Vir die jongste sportnuus volg Nuus24Sport op Twitter

- AFP