Wallabies wil vuurwerk lewer
2011-11-24 07:05
Londen – Die Australiese skrumskakel Will Genia het beloof Australië sal ’n vuurwerk-vertoning lewer wanneer hy Saterdag hier op Twickenham teen die Barbarians te staan kom.
Met die Wêreldbeker-rugbytoernooi en die gepaardgaande druk iets van die verlede, is die Wallabies meer in ’n gemaksone vir hul twee weke lange toer in die Verenigde Koninkryk.
“Dit gaan alles daaroor om vermaaklike rugby te speel. Ons wil nie hê mense moet terugkeer na hul huise en dink dat dit ’n vervelige wedstryd was nie. Ons gaan uitgaan om onsself te geniet,” het Genia gesê.
Dié buksie sal gemengde gevoelens oor Twickenham hê. Hy het in 2009 kop en skouers uitgestaan in die Aussies se sege van 18-9, maar verlede jaar is sy regstreekse teenstander, Ben Youngs, al die lof toegeswaai toe Engeland oortuigend met 35-18 met die besoekers afgereken het.
“Twee jaar gelede was baie spesiaal vir my. In vergelyking daarmee was 2010 nie só ’n goeie jaar nie. Ek het goed vertoon in Super-rugby, maar my duim gebreek en daarna ook my knie beseer.
“Met my terugkeer het ek gevoel ek was nie 100% fiks nie en ek het gevolglik nie baie goed teen Engeland gespeel nie. Maar ek dink ek het ’n goeie jaar tot dusver,” het Genia gesê.
En sy fiksheid sal beslis nie Saterdag lol nie. Genia sal in sy 30ste wedstryd op die veld draf naas die 18 Super-rugby- en 11 ander internasionale rugbywedstryde wat hy reeds vir 2011 op sy kerfstok het.
Genia se “bloedbroer” Quade Cooper sukkel met ’n kniebesering en die kans is goed dat eersgenoemde hierdie naweek James O’Connor met besit gaan voer.
O’Connor (21) sal sy internasionale buiging as losskakel maak as die Aussie-breier, Robbie Deans, hom wel aan die diepkant ingooi.
“Hy (O’Connor) is ’n goeie speler. Hy is oorgehaal om op losskakel uit te draf,” het Genia gesê.
Dit is Woensdag bevestig dat die Springbok-slot Victor Matfield die Baabaas in sy laaste wedstryd op die veld sal lei.
Die Barbarians se span is:
Isaia Toeva, Sam Tomkins, Robbie Fruean, Stirling Mortlock, Bryan Habana, Danny Cipriani, Peter Stringer, Adam Thomson, Mauro Bergamasco, Jerome Kaino, Victor Matfield (k), Simon Shaw, Sylvain Marconnet, Keven Mealamu, Eusebio Guinazu. PLAASVERVANGERS: Adriaan Strauss, Salvatore Perugini, Jason White, Marco Bortolami, Nemia Kenatale, Richard Kahui, Seru Rabeni. – AAP
Vir die jongste sportnuus volg Nuus24Sport op Twitter
– Sport24