WP verplaas druk effe na Blou Bulle
2011-10-03 08:00
Kaapstad – Die Westelike Provinsie se rugbyspan het die druk om die laaste plek in die Curriebeker-halfeindronde effens na die Blou Bulle verskuif deur die Haaie Saterdag in Durban met 15-10 te klop.
Die Streeptruie is die naweek vir ’n wyle deur die Bulle tot die vyfde posisie op die puntelys gedwing, maar is tans danksy dié sege met 36 ligapunte weer vierde. Die Bulle het 33.
Die laaste plek in die halfeindronde sal waarskynlik een van hierdie spanne s’n wees en dít sal hulle straks eers oor twee weke weet.
Die WP speel Saterdag in Johannesburg teen die Leeus en die week daarna op Nuweland teen die Pumas. Die Bulle lê die naweek besoek af in Kimberley, waar hulle Griekwas pak en ontvang die Luiperds die week daarna op Loftus Versfeld.
Die Pretorianers kan dus ’n maksimum van 43 ligapunte verdien en tensy die ietwat stotterende Griekwas nie Saterdag hul ou self is nie, sal die Bulle dit waarskynlik vermag.
Die WP het die Leeus vroeër in die seisoen op Nuweland met 28-26 geklop en behoort met enkele uitsonderings dieselfde beginspan te kan kies.
Saterdag in Bloemfontein is die Gautengers deur agtereenvolgende nederlae in die gesig gestaar, maar twee blitsdrieë kort voor die einde van die wedstryd het ’n gelykop-uitslag van 25-elk teen die Cheetahs afgedwing.
Die Leeus het reeds vir die halfeindronde gekwalifiseer. As hulle oor die volgende twee weke teen die WP en Haaie net 3 ligapunte insamel, sal daar ’n halfeindstryd op Coca-Colapark aangebied word.
Die WP se motivering is straks groter en hy’t gewys dat hy steeds ondanks hordes beserings die pyp teen ’n deurwinterde span soos die Haaie kan rook.
As die WP en Bulle ná ál hul ligawedstryde dieselfde ligapunte het, sal die een met die grootste punteverskil vir die halfeindronde kwalifiseer.
Die WP se punteverskil is tans 88 en die Bulle s’n 17.
Aan die gebruiklike brokkie slegte nuus het die naweek egter nie ontbreek nie.
Nadat die WP-loskopstut, JC Kritzinger, ná twee kniebeserings sy terugkeer gemaak het, het hy sy regterskouer teen die Haaie beseer.
Agterlangs het die blitsvinnige heelagter van die Streeptruie, Heinrich Steyl, sy been beseer.
Vir die jongste sportnuus volg Nuus24Sport op Twitter.
– Sport24