WP verder in knyp
2011-11-02 07:05
Stephen Nell en Marco Botha
Kaapstad – Die Westelike Provinsie se losskakel-spens raak al leër voor aanstaande seisoen.
Een van die Kaap se mees belowende generaals, Sam Lane, het Dinsdag op ’n vliegtuig geklim en sal eersdaags by Australië se Rugbyakademie inskakel.
Boonop het die WP nog nie ’n nuwe kontrak met Peter Grant beding om seker te maak dat hy in 2012 vir die Stormers gaan speel nie.
Kevin Foote, afrigter van die Universiteit van Kaapstad, het aan Sport24 bevestig dat Lane sy tasse gepak het.
“Hy sluit hom by die Australiese Rugbyakademie aan en is gister weg,” het Foote gesê.
Lane het reeds in vanjaar se Vodacombeker-reeks sy buiging op senior vlak gemaak, maar het toe ’n ernstige kniebesering opgedoen.
Die gewese Springbok-hulpafrigter Tim Lane se seun se naam word nou sterk aan die Melbourne Rebels gekoppel.
’n Skuif na Australië was vir hom ’n aantreklike opsie omdat hy waarskynlik daar vinniger kans sal kry om Super Rugby te speel.
Grant se agent, Craig Livingstone, het wel gesê dat daar nog gesprekke met die WP gevoer word.
“Peter is tot middel Maart in Japan gekontrakteer. Ons praat nog met die WP. Daar is belangstelling vir ’n nuwe kontrak in Japan, maar hy sal in daardie geval steeds vir Super Rugby beskikbaar wees.”
Die ontwikkelings rondom Grant en Lane volg op die vrystelling van Lionel Cronjé om vir die Blou Bulle te speel.
Sowel die Stormers as die WP se losskakel-reserwes was vanjaar onder yslike druk.
Die Stormers moes vier losskakels – Gary van Aswegen, Grant, Lionel Cronjé en Kurt Coleman – inspan. Dewaldt Duvenage moes soms gedurende wedstryde ook van skrumskakel daarheen skuif.
Van Aswegen kan aanstaande jaar ’n prominente rol vir die Kaapse streekspan speel.
Die Boland se Elgar Watts kan ook ’n aantreklike opsie vir die Stormers wees. Sy swak stelskopwerk het vroeër teen hom getel, maar hy het vanjaar in die Curriebeker se Eerste Liga goed vir die Kavaliers gekorrel.
Van Aswegen het vanjaar se Curriebeker-seisoen as die WP se eerstekeuse-losskakel begin, maar is in die heel eerste wedstryd op Nuweland, teen Griekwas, beseer.
Hy is vervang deur Demetri Catrakilis, wat in sewe agtereenvolgende wedstryde baie belofte getoon het alvorens hy ’n bisepspier teen Griekwas beseer het.
Coleman was toe nog effens krank en het maar by die WP se o.21-span ’n bietjie speelkans gekry.
Isma-eel Dollie is gevolglik met die Curriebeker-pligte opgesaal, maar benewens puik stelskoppe en skoppe uit die hand, het hy gesukkel om sy agterlyn op dreef te kry.
Hy het boonop ’n enkel teen die Blou Bulle beseer, maar in albei sy wedstryde vir die WP is hy mettertyd deur Duvenage op losskakel vervang.
Dollie is toe deur Cronjé vervang, maar hy het twee swak wedstryde beleef en is summier uit die WP se 22-tal gepos toe Catrakilis weer kon speel.
Dié Griek het die WP se laaste drie wedstryde op losskakel waargeneem en was deurgaans voortreflik as stelskopper onder geweldige druk.
Sy taktiese skopwerk was goed, maar hy ontbreek nog ’n tikkie ywer en waagmoed op die aanval.
Gio Aplon het wel teen die Pumas ’n paar minute op losskakel speelkans gekry en het goed vertoon. Hy sal egter vir die Stormers as vleuel en heelagter oorweeg word.
– Sport24
– Bly op hoogte van al die jongste sportnuus deur Nuus24Sport op Twitter te volg