WP-kaptein wil weer haker speel
2012-10-29 14:08
Kaapstad – Die WP se Curriebeker-kaptein, Deon Fourie, het gesê hy sal volgende jaar weer op die haker-posisie fokus, ten spyte van sy indrukwekkende spelpeil op flank.
Fourie het tydens die Streeptruie se Curriebeker-veldtog net twee van die 12 wedstryde in die nommer-twee-trui begin.
Allister Coetzee, afrigter van die WP, het Fourie aanvanklik na flank geskuif toe die span ‘n tekort aan losvoorspelers gehad het met beserings aan Schalk Burger, Siya Kolisi en Nizaam Carr.
Fourie het beïndruk in die rol as oopkantflank, met sy beste wedstryd was waarskynlik die oorwinning van 25-18 teen die Haaie in die eindstryd in Durban, toe hy as speler van die wedstryd aangewys is.
“Ek het my tyd op flank geniet, maar ek sal weer haker speel in volgende jaar se Superrugby-reeks. Met ouens soos Schalk en Siya wat terugkeer ná hulle beserings sal hulle die voorkeur-flanke wees,” het Fourie aan Keo.co.za gesê.
Fourie was ook verheug oor sy nuwe kontrak met die WP ná maande se bespiegelings dat hy dalk by die Franse klub Toulon kan aansluit.
“My skuif na Toulon het ‘n paar haakplekke gehad, maar ek is baie bly dat ek in die Kaap kan bly. Daardie besluit is al voor die Curriebeker-eindstryd gemaak, so jy kan net dink hoe dit moet voel om deel van hierdie wenspan te wees. Ek kan nie sien hoe ek vir ‘n ander unie kan speel nie.”
“Dit kom nou al ‘n lang tyd, maar ons is uiteindelik oor die wenstreep. Ek sien daarna uit om volgende jaar op hierdie sukses voort te bou. Daar kom volgende jaar ‘n paar ervare ouens terug ná hulle beserings en met die jong ouens wat naam gemaak het tydens die Curriebeker sal ons ‘n sterk groep hê.”
Die Stormers sal volgende seisoen goeie diepte op haker hê met Fourie, die Springbok Tiaan Liebenberg en die 20-jarige Scarra Ntubeni wat almal vanjaar goeie rugby gespeel het.
– Vir die jongste sportnuus volg Nuus24Sport op Twitter.
