WP gaan ál sy Bokke laat speel
2011-10-13 08:08
Kaapstad – Allister Coetzee, hoof-afrigter van die Westelike Provinsie, wou nog Maandag sy meegevoel met sy ses Wêreldbeker-Bokke betuig toe dié wou weet waar hulle vir hul eerste Curriebeker-rugbyoefening moet aanmeld.
Hulle is Schalk Burger, Jean de Villiers, Jaque Fourie, Gio Aplon, Juan de Jongh en Bryan Habana.
“Man, ek het skaars begin praat toe hulle soos een man sê hulle wil deel van ons Curriebeker-veldtog wees. Ál ses is dus beskikbaar om Saterdag teen die Pumas te speel.
“En dit spreek boekdele van die ouens se ingesteldheid teenoor die WP-span en wat ons wil bereik,” het Coetzee gister gesê.
De Jongh het gisteraand eers in die Kaap aangekom en nog nie geoefen nie. Hy het wel op Twitter op ’n ondersteuner se vraag gereageer: “(Sal) moet sien tjom, sal graag in die blue & white hoops wil speel.”
Volgens Coetzee het die Springbokke nog “rou wonde” ná Sondag se kwarteind-nederlaag teen Australië en hy sou verstaan het indien hulle nie nou al wou speel nie.
“Maar hierdie nuwe omgewing met vars doelwitte lyk of dit ook help om daardie seer te verwerk. En die entoesiasme waarmee hulle dit doen, is goed vir almal van ons,” meen hy.
Vanweë die Wêreldbeker-program het die Springbokke nie verwag om vanjaar weer Curriebeker-rugby te speel nie, maar volgens Coetzee het die WP se kans om hierdie naweek vir die halfeindronde te kwalifiseer as ’n geelwortel vir hul deelname gedien.
“Ons Bokke het iets om voor te speel. Dis ook ’n kans om vir verlede jaar se teleurstelling in die eindstryd (teen die Haaie) te probeer vergoed,” het die breier verduidelik.
Boonop kan vanjaar hul laaste proesel Curriebeker-rugby wees. Die veronderstelde sesspan-kompetisie van volgende jaar gaan straks met die verlengde Super Rugby-reeks oorvleuel. Dié word in Junie tydelik vir die Viernasies-reeks onderbreek. Teen die tyd dat die Super Rugby-reeks sy uitspeelrondes bereik, behoort die Curriebeker-reeks al aan die gang te wees.
Maar vir nou is Coetzee al te dankbaar dat die Bokke terug is in streeptruie.
“Dit voel amper onwerklik, want ons het vanjaar al soveel beserings gehad en ons moes dikwels diep delf om 22 spelers te hê wat fiks is.
“Die jong spelers verdien krediet daarvoor dat ons nog vir die uitkloprondes kan kwalifiseer. Ek is seker hierdie seisoen gaan ons op die langtermyn bevoordeel.
“Mense lag mos maar as ’n ou van ou gesegdes gebruik maak. Maar ek sê jou daardie wolk met ’n silwer randjie en die lig aan die einde van die tonnel is nou ’n groot waarheid vir ons,” het Coetzee in ’n kalm stemtoon gesê.
– Vir die jongste sportnuus volg Nuus24Sport op Twitter.
- Die Burger