WP, blaser maak vrede
2009-10-07 06:48
Kaapstad - Die Westelike Provinsie het die vredespyp met Marius Jonker gerook en sy aanstelling as skeidsregter vir Saterdag se Curriebeker-rugbywedstryd teen die Leeus op Coca-Colapark maak die WP nie “vreesbevange” nie.
Jonker was verlede maand ’n ongewilde man in die WP-kamp ná ’n strafskoptelling van 16-1 vir die Vrystaat-Cheetahs én die toekenning van ’n strafdrie in die doodsnikke.
Dit het die Streeptruie tot ’n nederlaag van 31-33 verdoem.
“Marius het die Donderdag ná die Cheetah-wedstryd van Richardsbaai af Kaapstad toe gevlieg en ons het saam deur die beeldmateriaal gewerk,” sê die WP se senior professionele afrigter, Rassie Erasmus.
“Ons beskou dit nie meer as ’n kwessie nie, want die lug is lankal gesuiwer.”
Jonker het gister aan Sport24 die hoop uitgespreek dat sy besluite Saterdag nie wéér ’n gesprekspunt sal wees nie.
“Ek hoop ál gesprekspunt ná die wedstryd is die goeie rugby wat deur albei spanne gespeel is,” sê Jonker.
Hy het vanjaar gewys dat hy bereid is om groot besluite te neem – en het sowel die WP as die Leeus die harnas in gejaag.
Die Leeus was erg omgekrap omdat Jonker in hul kragmeting met Griekwas in Kimberley nie die TV-skeidsregter oor ’n beslissing geraadpleeg het wat tot ’n moontlike drie kon lei nie.
Die Leeus is met 36-31 geklop.
Die Leeus sê Jonker moes die mening van die TV-skeidsregter gepols het voordat hy ’n skrum beveel het.
Vroeër vanjaar het Jonker in die Super14-kragmeting tussen die Lions en Waratahs beslis dat André Pretorius se aangee na Deon van Rensburg vorentoe was.
Dit was in die laaste minuut en die Lions het ’n nederlaag van 33-38 gely. As hy die drie toegeken het, sou die telling 38-elk gewees het – met die doelskop wat op Pretorius gewag het.
Dis nie toevallig nie dat die WP vandeesweek klem op die afbreekpunte geplaas het.
Die Streeptruie se afrigter, Allister Coetzee, sê die Leeus is baie gedug by die afbreekpunte.
Dis seker waar, maar Jonker het die WP teen die Cheetahs kwaai by die afbreekpunte laat deurloop.
“Ek blaas soos ek dit sien.
“Ek het nie werklik ’n tendens in die WP se spel (teen die Cheetahs) teëgekom nie en miskien het hulle net een van dáárdie dae gehad,” sê Jonker.
“Jy het nie vooroordele in ’n wedstryd nie.
“Ek en Rassie het lekker gesels en daar is nie drama nie.
“Dis weer twee spanne met goeie lostrio’s, so ek verwag daar sal groot wedywering by die afbreekpunte wees.”
- Die Burger
