WP-8 sal Saterdag geweeg word
2010-08-11 07:52
Kaapstad – Dis vir alle praktiese doeleindes ’n geval van “toetsrugby” wat Saterdag op die Westelike Provinsie in hul Curriebeker-rugbywedstryd teen die Blou Bulle op Nuweland wag.
Matthew Proudfoot, voorspeler-afrigter van die WP, glo dié kragmeting sal die maatstaf wees om te sien hoe sy pak ontwikkel het sedert hy in die Super14-eindstryd in Soweto deur die Bulls verniel is.
Al sou wraaksug geen doel dien nie, het die Super14-eindstryd motivering op ’n ander vlak ontketen.
“Dit was beslis motivering om introspeksie te doen en het die saadjie geplant vir die koers wat ons sedertdien ingeslaan het,” sê Proudfoot.
“Ons sal nou sien watter vordering gemaak is. Hierdie wedstryd sal vir die voorspelers ’n blik bied op hoe goed hulle werklik is.”
Terwyl die Bulls sonder sterre soos Victor Matfield, Danie Rossouw, Bakkies Botha, Pierre Spies en Gurthrö Steenkamp onder hul voorspelers moet regkom, verwag Proudfoot dieselfde soort uitdaging as gewoonlik.
“Die Bulls het ’n baie goeie pak en hul speelstyl verander nie, ongeag die spelers. Gary Botha lei die span baie goed. Ons verwag ’n baie fisieke wedstryd,” sê Proudfoot.
“Vir diegene wat nie toetsrugby speel nie, is ’n wedstryd teen die Bulle so naby as wat jy andersins daaraan kan kom.”
Proudfoot se woorde sal as motivering dien vir manne soos die haker Tiaan Liebenberg en die agtsteman Duane Vermeulen. Albei is ondanks goeie spelpeil sedert begin vanjaar nog nie met plekke in die Bok-groep beloon nie.
Liebenberg en Botha word deur menige kenner as Suid-Afrika se voorste hakers benewens Bismarck du Plessis beskou.
Dis slegs die Springbok-kaptein, John Smit, se reputasie wat hom tans in die nasionale opset hou, terwyl selfs die parlementêre portefeuljekomitee oor sport behoort te sukkel om die keuse van Chiliboy Ralepelle as sy adjudant te regverdig.
Dit maak die tweestryd tussen Liebenberg en Botha ’n heerlike vooruitsig, en hopelik sorg dit vir ’n hoogtepunt.
Die Streeptruie moet wel sonder Francois Louw in die lostrio regkom, terwyl Juan de Jongh en Gio Aplon agterlangs ook vanweë Bok-verpligtinge nie beskikbaar is nie.
Dit kan straks Rynhardt Elstadt weer as flank in die prentjie bring, terwyl Tim Whitehead vir De Jongh behoort te vervang.