WB-sondaar lei Wallis teen Aussies
2011-11-30 09:56
Bloemfontein. – Wallis se Wêreldbeker-sondaar, Sam Warburton, is terug op sy pos en sal Saterdag in die Millennium-stadion in Cardiff sy rugbyspan se aanslag teen Australië lei.
Die insluiting van Wallis se kaptein is een van ses veranderings wat sy afrigter, Warren Gatland, aangebring het aan die span wat in sy laaste toets – teen die einste Wallabies in die Wêreldbeker-toernooi in Nieu-Seeland – vasgeval het.
Warburton was weens ’n skorsing ná die Rooi Drake se Wêreldbeker-halfeindstryd teen Frankryk nie in hul uitspeelstryd om die derde plek teen die Aussies in aksie nie.
Dié flank het vroeg in sy span se nederlaag van 8-9 teen die Hane ’n gevaarlike duikslag uitgevoer en is ná ’n rooikaart van die veld. Sy span moes daarna vir 63 minute met 14 spelers klaarkom.
Benewens Warburton se terugkeer, sal die slot Ian Evans die eerste keer in drie jaar vir sy land uitdraf en die stut Scott Andrews is die eerste keer in die beginspan.
Evans vervang die beseerde Luke Charteris (gewrig) en Andrews Adam Jones (kuit).
Die senter Scott Williams speel in die beseerde Jonathan Davies (lies) se plek.
Die tuisspan sal ook met ’n nuwe skakelpaar uitdraf. Lloyd Williams speel in Mike Phillips se skrumskakel-trui en Rhys Priestland begin as losskakel.
James Hook en Phillips is onderskeidelik nie deur hul Franse klubspanne, Perpignan en Bayonne, vrygestel nie, aangesien die kragmeting buite die Internasionale Rugbyraad se vensterperiode vir toetse val.
Die veteraan-vleuel Shane Williams sal in sy laaste toets speel en is een van nege spelers wat vir Wallis se Wêreldbeker-nederlaag teen die Wallabies wil vergoed.
Die Aussies was naelskraap baas met 21-18.
Gatland meen die 34-jarige Williams, wat in sy 87ste toets speel, kon nie vir ’n beter swanesang gevra het nie.
“Dit gebeur nie aldag in beroepsport dat ’n speler die geleentheid kry om sy internasionale uittrede aan te kondig en dan sy laaste wedstryd voor sy tuisskare te speel nie,” het Gatland aan walesonline gesê.
Die afrigter hoop Wallis se ondersteuners groet dié legende op ’n gepaste wyse.
Die Walliese span is: Leigh Halfpenny, George North, Scott Williams, Jamie Roberts, Shane Williams, Rhys Priestland, Lloyd Williams, Toby Faletau, Sam Warburton (k), Dan Lydiate, Ian Evans, Bradley Davies, Scott Andrews, Huw Bennett, Gethin Jenkins. PLAASVERVANGERS: Matthew Rees, Ryan Bevington, Ryan Jones, Justin Tipuric, Tavis Knoyle, Dan Biggar, Alex Cuthbert.
Vir die jongste sportnuus volg Nuus24Sport op Twitter.
– Sport24
