Vrystaat wil Haaie se resep gebruik
2010-08-25 07:14
Bloemfontein - Die Vrystaat-rugbyspan kan gerus vir Vrydag se Curriebeker-wedstryd teen die Westelike Provinsie by die Haaie kers opsteek oor hoe om die Kapenaars te troef.
Dit wil lyk asof die Durbaniete vanjaar ’n wenresep gevind het om ’n sterk Kaapse span hok te slaan en daarom kan die Vrystaters daarna loer.
Die Haaie het nie net Saterdag in Durban die Streeptruie hul eerste loesing van die Curriebeker-reeks met 27-16 toegedien nie, maar die Sharks was ook daar met 20-14 oor die Stormers in die Super14-reeks baas.
Boonop was die Kapenaars voor albei dié kragmetings die gunstelinge en moes hul teenstanders op hul beste wees om te kon seëvier.
Die WP was voor sy nederlaag teen die Haaie byna onstuitbaar en die Stormers het uiteindelik die Super14-eindstryd gehaal.
Volgens Hawies Fourie, agterlynafrigter van die Vrystaat, het die Haaie beslis die WP met ’n goeie plan getroef.
“Die Haaie het die Kapenaars in die Super14 en Curriebeker met min of meer dieselfde resep geklop. Dit het hulle gedoen deur baie met hul voorspelers en meer direk te speel.
“Die WP maak gewoonlik seker dat daar nie te veel spelers by losgemale betrokke is nie en die Haaie het dit reggekry om meer van hulle in te trek.
“Ouens soos die haker, Bismarck du Plessis, en die flank Willem Alberts het die Haaie goeie momentum op die aanval gegee, terwyl die agtsteman, Ryan Kankowski, ook baie goed was. Daar is min spelers met Kankow¬ski se vaart en krag wat ’n drie soos syne teen die WP kan druk,” sê hy.
Die Cheetahs het in hul agtsteman, Ashley Johnson, haker, Adriaan Strauss, en die stut Coenie Oosthuizen genoeg slaankrag om soos die span van KwaZulu-Natal te kan maak.
Hoewel die Vrystaat in 2010 gesukkel het om as ’n span te speel, was dié drie as spelbrekers dikwels staatmakers en sal hul vertoning teen die WP deurslaggewend wees.
Boonop het agterspelers soos die senter Robert Ebersohn ook teen die Luiperds op die voorgrond getree en is dit veral verblydend voor die eerste wedstryd van die tweede ronde van die Curriebeker-reeks.
Fourie meen dit was belangrik vir die Cheetahs se selfvertroue dat hulle teen die Luiperds goed aanval, maar sê hulle het steeds te veel onnodige foute soos aanslane begaan.
“Die groot ding is dat ons met dieselfde dringendheid waarmee ons teen die Luiperds gespeel het, teen die WP moet speel. As jy iets teen die WP skep, moet jy gaan druk, anders gaan jy nie die wedstryd wen nie,” sê hy.
Bly op hoogte van al die jongste sportnuus deur Nuus24Sport op Twitter te volg.
- Sport24