Vrystaat wil Haai-ysters met flair troef
2011-10-22 09:16
Durban – As daar nie vandag hier onverwags water in die Haaitenk beland nie, sal die Cheetahs, soos op die Vrystaatse vlaktes, voet in die hoek sit.
Die besoekers beplan nie om nou in die halfeindstryd van hul aanvallende benadering in die Curriebeker-rugbyreeks af te wyk nie.
Volgens Naka Drotské, die Vrystaters se afrigter, sal sy span waarskynlik met sy suksesvolle hardloopresep volhard, selfs al is dit ’n uitklopwedstryd.
Die Vrystaters het die Haaie in die spanne se vorige ontmoeting in die Vrystaat-stadion dronk gehardloop en ’n oortuigende sege van 53-32 behaal.
Maar, en dis ’n Springbok-belaaide maar, die Haaie draf dié keer met heelwat skerper tande en beslis ’n groter honger uit.
Buiten hul agtsteman, Ryan Kankowski, wat die Vrystaters al dikwels hoofpyne besorg het, speel die tuisspan met ’n hele klomp honger Wêreldbeker-Bokke wat nou die Goue Beker in plaas van die Webb Ellis-beker jag.
Die Haaie se haker, Bismarck du Plessis, die stutte, Jannie du Plessis en Beast Mtawarira, die flank Willem Alberts, die vleuel JP Pietersen en die heelagter, Patrick Lambie, het twee weke gelede stert tussen die bene van Nieu-Seeland af teruggekeer.
Boonop het dit verlede week hier teen ’n verswakte Leeus-span gelyk asof John Plumtree (breier) se Bokke met meer gemak as gewoonlik by hul provinsiale spanmaats ingeskakel het. Almal van hulle, behalwe Mtawarira, was in die slagting van 53-9 teen die Rooibontes in aksie.
Dus is die Vrystaat die buiteperd, ’n posisie waarvan hy hou – veral teen die Haaie.
En met ’n sonskyndag van 30°C wat voorspel word, sal Drotské nie nodig hê om jong sterre soos sy losskakel, Johan Goosen, of die senter Robert Ebersohn aan te moedig om hul Vrystaatse flair ten toon te stel nie.
“Die enigste ding wat ons anders sal doen, is om ’n bietjie minder in ons eie halfgebied te speel, maar dit sal ook afhang van die humiditeit en of die bal glad is.”
Dit het gelyk asof die toestande verlede naweek nie juis ’n groot invloed op die wedstryd tussen die Haaie en die Leeus gehad het nie.
“Indien dit wel so is dat ons die bal kan rondgooi, sal ons só maak. Ons sal nie afwyk van ons normale patroon nie,” sê Drotské.
Hoewel Kankowski nie by die Wêreldbeker-veldtog betrokke was nie, beskou die Cheetahs hom as die groot gevaarman in die Haaie se span en is daar spesifiek planne beraam om hom hok te slaan.
Die spanne is:
Haaie: Patrick Lambie, Odwa Ndungane, Stefan Terblanche, Marius Joubert, JP Pietersen, Frederic Michalak, Conrad Hoffmann, Ryan Kankowski, Willem Alberts, Keegan Daniel (k), Ross Skeate, Jean Deysel/Anton Bresler, Jannie du Plessis, Bismarck du Plessis, Tendai Mtawarira. PLAASVERVANGERS: Craig Burden, Eugene van Staden, Marcell Coetzee, Jacques Botes, Ross Cronjé, Adi Jacobs, Lwazi Mvovo.
Vrystaat: Hennie Daniller, Rayno Benjamin, Robert Ebersohn, Andries Strauss, Cameron Jacobs, Johan Goosen, Pieter van Zyl, Boom Prinsloo, Ashley Johnson, Lappies Labuschagné, Izak van der Westhuizen, Philip van der Walt, WP Nel, Adriaan Strauss (k), Marcel van der Merwe. PLAASVERVANGERS: Hercu Liebenberg, Trevor Nyakane, Wilhelm Steenkamp, Johan Wessels, Tewis de Bruyn, Sias Ebersohn, Nico Scheepers.
Skeidsregter: Marius Jonker.
– Vir die jongste sportnuus volg Nuus24Sport op Twitter.
– Sport24