Vrystaat kwaad oor té min kaartjies
2009-10-22 08:06
Bloemfontein – Die Vrystaatse Rugby-unie (VRU) en ondersteuners van die Vrystaat-Cheetahs spoeg vuur nadat die Blou Bulle Maatskappy geweier het om aan hul versoek van 5 000 kaartjies vir die Curriebeker-eindstryd te voldoen.
Die eindstryd vind volgende naweek – op 31 Oktober – in Pretoria plaas.
Die Blou Bulle het slegs 3 000 van die beskikbare 49 875 kaartjies vir die eindstryd aan die VRU toegeken.
“Ons, veral die ondersteuners, is hoogs ontevrede daaroor,” het Harold Verster, president van die VRU, gesê.
“Die Bulle behoort eintlik aan ons dankie te sê dat die eindstryd wel op Loftus Versfeld plaasvind. Ons moes die Haaie in die halfeindstryd uitskakel vir ’n eindstryd in Pretoria.”
Verster sê SA Rugby het geen beleid oor hoeveel kaartjies aan ’n besoekende span toegeken moet word nie.
“Dít is ’n saak wat ek beslis binnekort met SA Rugby sal aanroer sodat dit in die toekoms reggestel kan word.
“Ironies is daar meer spanne van die Vrystaat op 31 Oktober op Loftus in aksie as van die Blou Bulle self,” volgens Verster.
Afgesien van die Cheetahs, sal die o.19- en o.21-spanne van die Vrystaat ook in aksie wees. Die o.19-span kom teen die Leeus te staan, terwyl die o.21-span die Haaie pak.
Barend van Graan, uitvoerende hoof van die Blou Bulle Maatskappy, was nie gisteraand vir kommentaar beskikbaar nie.
- Beeld