Vrystaat het ook sy eie baardman
2011-09-22 10:01
Bloemfontein – Frankryk het vir Sebastien Chabal en die Springbokke vir Geo Cronjé gehad.
Die Leeus se Curriebeker-span spog met Josh Strauss en Kanada se Adam Kleeberger maak opslae by die Wêreldbeker-rugbytoernooi, maar nou het die Vrystaat ook sy eie baardman.
Nee, hy is nie die Vrystaat-losvoorspeler Boom Prinsloo, wat ook ’n baard kan kweek en na wie die slot trek, se broer nie.
Andries Stephanus Ferreira is die Vrystaters se nuwe aanwins en het hom van die Franse klubspan Biarritz tot einde 2012 by die Cheetahs aangesluit.
Die voormalige Jong Bokkie het vroeër vanjaar ’n kontrak van twee jaar met dié Franse Top14-span gesluit, maar is vanweë persoonlike redes vrygestel om na Suid-Afrika terug te keer.
Naka Drotské, die Vrystaat-afrigter, het besluit om sy slot-diepte met dié baardman, wat 117 kg weeg en 1,97 m lank is, aan te vul.
Boonop het die vertrek van Wilhelm Steenkamp, wat hom later by die Blou Bulle aansluit, ’n leemte gelaat.
Die 21-jarige Ferreira het beslis die agtergrond om ’n grote te word en sien uit om deel van die Cheetahs se toekoms te wees.
Hy was in Affies en het die Bulle op die Cravenweek, asook op o.19-, o.21- en Vodacombeker-vlak verteenwoordig.
Hy het ook twee jaar vir die Suid-Afrikaanse o.20-span uitgedraf. Verlede jaar was hy saam met onder meer die Vrystaat-stut Marcel van der Merwe, Bulle-senter Francois Venter en Leeus-heelagter Jaco Taute in dié span. Die vorige jaar was die Vrystaat-senter Robert en -losskakel Sias Ebersohn van sy spanmaats.
Die boorling van Despatch was voor sy vertrek na Biarritz nog in 2011 se Varsitybeker-reeks vir die Tshwane-universiteit van Tegnologie in aksie.
“Ek kan hom nou vir die Curriebeker oorweeg, maar ’n ou kon nog nie veel van hom op die oefenveld sien nie.
“Ek het vir Andries gesê hy is vir nou back up en ons wil hom graag vir 2012 begin kondisioneer,” sê Drotské.
Ferreira het by Biarritz saam met bekendes soos Iain Balshaw, Dimitri Yachvili en Damien Traille gespeel.
“Ek voel daar is geleenthede by die Cheetahs om Super Rugby en dalk selfs later vanjaar Curriebeker te speel.
“Die skuif is goed vir my toekoms. Hier is ’n klomp jong ouens soos Coenie Oosthuizen, Lappies Labuschagné, Johan Goosen, Heinrich Brüssow, asook Sias en Robert Ebersohn wat hier bly.
“Daar is ’n paar groot jare wat vir die Vrystaat voorlê,” sê Ferreira.
Hy glimlag wanneer hy oor sy baard uitgevra word.
“Toe ek Frankryk toe is, het ek net besluit om nie weer te skeer nie.”
Hy sê die baard is ook deels om godsdienstige redes en dat hy dit wel in die toekoms sal afskeer.
Vir die jongste sportnuus volg Nuus24Sport op Twitter.
– Sport24