Vraagtekens hang oor Barry
2011-11-30 07:07
Port Elizabeth – Is die oud-Springbok De Wet Barry se dae as rugbyspeler getel – of gaan dié veteraan weer vir die Oostelike Provinsie-Kings speel?
Dít is die vraag waaroor in Oos-Kaapse rugbykringe gegis word nadat ’n mediakonferensie waar Barry se toekomsplanne duidelik gemaak sou word Dinsdag op die nippertjie gekanselleer is.
Voor dit is algemeen aanvaar dat Barry (33) sy stewels sou ophang en die Kings se verdedigingsafrigter sou word. Hy het dié werk reeds verlede jaar gedoen terwyl hy ná ’n tweede ernstige skouerbesering aangesterk het.
Sy naam verskyn ook met dié titelbeskrywing in die OP Rugbyunie se jaarverslag as deel van die OP se personeel.
Barry het die afgelope seisoen die een frustrasie ná die ander beleef. In November 2010 het hy ’n skoueroperasie ondergaan en was hy vir ongeveer vier en ’n half maande nie op die speelveld nie.
Toe hy eindelik sy kans kry, in Maart vanjaar in ’n Vodacombeker-wedstryd teen die Leeus, het die beseringspook wéér toegeslaan. Barry is ná net sowat 25 minute met nóg ’n skouerbesering van die veld af.
Hy het toe op die Kings se webwerf geskryf dat “beserings maar deel van rugby is”.
Hoewel hy toe as die Kings se verdedigingsafrigter begin werk het, was dit ook duidelik dat dié veteraan van ongeveer 250 eersterangse wedstryde steeds na aksie gehunker het.
Dít is darem nie die manier waarop enige speler sy loopbaan wil afsluit nie.
Barry is steeds ’n voorbeeld vir enige jong speler wanneer dit by toewyding kom.
Hy is fiks en, sy ouderdom ten spyt, kan hy steeds vir die Kings van waarde wees as speler – mits die beserings wegbly.
Sy naam verskyn tussen dié van die Kings se gekontrakteerde spelers, maar Alan Solomons, die Kings-breier, wou nie oor sy toekoms as speler gesels nie. Dít is waar die idee posgevat het dat Barry as verdedigingsafrigter sou voortgaan.
Nou wonder ondersteuners of Barry tog wel weer sy rugbystewels gaan aantrek.
- Die ander gekontrakteerde senters in die Kings-groep is Jaco Bekker, Siyanda Grey, Wayne Stevens en Matthew Tayler-Smith. Paul Perez (vleuel), Shane Gates (losskakel) en Tiger Mangweni (heelagter) kan ook in dié posisie oorweeg word.
– Sport24
– Bly op hoogte van al die jongste sportnuus deur Nuus24Sport op Twitter te volg