Voormalige Wallaby-afrigter sterk aan ná hartaanval

2013-01-03 14:55

Sydney – Bob Dwyer, voormalige afrigter van die Wallabies, sterk aan in die hospitaal na hy ‘n hartaanval gekry het, het die Australiese rugby-unie (ARU) in ‘n verklaring gesê.

Die 72-jarige Dwyer het glo Woensdag pyn in sy bors gekry op sy plaas naby Sydney. Hy is na ‘n hospitaal geneem, waar hy die aanval gekry het. Hy moes ook ‘n noodoperasie ondergaan.

“Ek voel nou verbasend goed, maar ek weet ook as ek nie in sulke goeie hande was nie, sou ons nie nou hieroor gepraat het nie,” het Dwyer in die verklaring gesê.

Dwyer was die afrigter van die Wallabies toe hulle in 1991 die Wêreldbeker in Engeland verower het.

Hy het later ook Engeland en die Warathas afgerig.

Hy is in 2011 by die Internasionale Rugbyraad se eregalery ingehuldig.

– Vir die jongste sportnuus volg Nuus24Sport op Twitter.
 

- Sapa - AP