Voormalige Skotse kaptein tree af

2013-01-07 15:09

Edinburgh – Skotland se mees ervare skrumskakel, Mike Blair, het sy uittrede uit internasionale rugby op die ouderdom van 31 aangekondig.

Blair het 85 keer vir Skotland uitgedraf en het die span 14 keer aangevoer.

Sy besluit kom net ses weke na Andy Robinson as hoofafrigter van die span bedank het ná 'n nederlaag teen Tonga.

Die Australiër Scott Johnson gaan die span afrig vir die komende Sesnasies-reeks.

“Ek is in die baie gelukkige posisie om self te kan besluit wanneer my internasionale loopbaan eindig en vir my is daardie tyd nou,” het Blair Maandag in ‘n verklaring gesê.

Blair het verduidelik dat sy besluit deels 'n gevolg is van sy familie-omstandighede, maar ook om die Skotse span ‘n goeie geleentheid te gee om te bou voor die volgende wêreldbeker in 2015.

– Vir die jongste sportnuus volg Nuus24Sport op Twitter.
 

- Sapa - AFP