Vonke spat oor Mapoe
2010-08-12 06:41
Hendrik Cronjé en Jóhann Thormählen
Bloemfontein – Nuwe regstappe dreig rondom die dienste van die Blitsbok Lionel Mapoe.
In die jongste wending oorweeg die Vrystaatse Rugbyunie regstappe teen die vleuel se agente.
Dit volg nadat ’n aribiter Dinsdagaand beslis het dat Mapoe ’n bindende kontrak met die Vrystaat het.
Adv. Bertus van Rhyn het laat Dinsdagaand uitspraak gelewer in die kontrakgeskil tussen die Vrystaat en die Haaie oor Mapoe.
Van Rhyn het beslis dat Mapoe, wat hom voor die Curriebeker-reeks by die Haaie aangesluit het, ’n geldige kontrak met die Vrystaat het.
Maar volgens Jan-Harm van Wyk, sy agent en ’n voormalige vleuel van die Vrystaat, wil Mapoe ondanks dié uitspraak nie vir die Cheetahs uitdraf nie en sal hy eerder ophou rugby speel as hy daartoe gedwing sou word.
Sport24 kan ook eksklusief onthul dat Mapoe by die Springbokke betrek kan word nog voordat hy sy terugkeer tot die speelveld maak.
Daar word verneem dat verskeie senior spelers in die Bok-groep die Springbok-afrigter, Peter de Villiers, versoek het om Mapoe nader te trek.
Die 22-jarige Blitsbok het volgens Van Wyk volkome van ’n onlangse skouerbesering herstel en is al ’n week verkiesbaar om Curriebeker-rugby te speel.
Intussen het die Vrystaat sy span vir Saterdag se Curriebeker-kragmeting met die Leeus in Johannesburg aangewys.
Die Vrystaat-span is: Hennie Daniller, Philip Snyman, Robert Ebersohn, Meyer Bosman, Jongi Nokwe, Louis Strydom, Tewis de Bruyn, Ashley Johnson, Francois Uys, Hendro Scholtz, Waltie Vermeulen, Izak van der Westhuizen, WP Nel, Adriaan Strauss (k), Coenie Oosthuizen.
PLAASVERVANGERS: Skipper Badenhorst, Kobus Calldo, Philip van der Walt, Kabamba Floors, Tertius Carse, Sias Ebersohn, JW Jonker.
- Sport24
Bly op hoogte van al die jongste sportnuus deur Nuus24Sport op Twitter te volg